In dals stars als campiunadis mundials è stada Lara Gut-Behrami. La Tessinaisa ha gudagnà duas medaglias dad aur (super-G e slalom gigant) ed ina medaglia da bronz (cursa rapida). Er Corinne Suter ha pudì mussar sia meglra prestaziun pussaivla a las pli impurtantas cursas da la stagiun. Suter è vegnida campiunessa mundiala en la cursa rapida. Plinavant ha la skiunza da 26 onns gudagnà argient en il super-G.
Uschia pon ins trair ord vista svizra ina bilantscha positiva da quels campiunadis mundials 2021. Dapli medaglias avevi dà l'ultimada giada il 1989 a Vail en ils Stadis Unids cun 11 medaglias.
Gisin e Holdener n'han betg pudì persvader
Lara Gut-Behrami e Corinne Suter han fatg la meglra figura a Cortina. Betg pudì persvader dal tut han percunter Michelle Gisin e Wendy Holdener. Gisin ha bain gudagnà bronz en la cumbinaziun, da l'autra vart ha ella stuì magunar ina terrada en las disciplinas tecnicas. Tant en il slalom sco er en il slalom gigant valeva Michelle Gisin sco ina da las favuritas. Senza medaglia sto Wendy Holdener turnar a chasa, ella ch'è adina stada in garant da medaglia als davos gronds eveniments. A Holdener na vai dentant durant l'entira stagiun betg sco giavischà. Uschia è il quart plaz en il slalom in bun resultat.
Bilantscha dividida tar ils umens
La pli gronda trumpada tar ils umens è senza dubi stà la prestaziun dal quartet svizzer en il slalom gigant. Tuts quatter cun Marco Odermatt, Gino Caviezel, Loïc Meillard e Justin Murisier valevan sco candidats da medaglia. Cun excepziun da Meillard ch'è vegnì 5avel èn tuts crudads ora. Ina terrada principalmain per il grond trumf svizzer, Marco Odermatt ch'era adina stà classà tranter ils top quatter en questa disciplina durant la stagiun actuala.
La pli gronda trumpada da mia carriera
Gudagnà sia medaglia, quasi obligata, ha puspè ina giada Beat Feuz. En la cursa rapida è il Bernais vegnì terz. Suenter bronz il 2015 a Beaver Creek ed aur il 2017 a San Murezzan èsi gia sia terza medaglia en ina cursa rapida da campiunadis mundials.
Cuntent dastga er Loïc Meillard esser. El turna a chasa cun duas medaglias. Tant en la cumbinaziun sco era en il slalom parallel ha el gudagnà bronz.
Austria naziun numer 1
Betg la Svizra, mabain l'Austria è stada la naziun numer 1 a quests campiunadis mundials a Cortina d'Ampezzo. Cun 5 medaglias dad aur, ina d'argient e duas da bronz han ils Austriacs gudagnà il spievel da medaglias. Vincent Kriechmayr ha triumfà en la cursa rapida ed en il super-G, Marco Schwarz en la cumbinaziun e Katharina Liensberger en il slalom ed en il slalom parallel.
Gist cun quatter medaglias turna Mikaela Shiffrin a chasa. Ella ha gudagnà aur en la cumbinaziun, argient en il slalom gigant e bronz en il super-G ed en il slalom.