Sin il campiun mundial, il Franzos Jérôme Gilloux ha Vital Albin pers 4:58 minutas. Albin ch'era sesì pir avant paucs dis l'emprima giada sin quest e-bike ha oravant tut persvadì durant la segunda part da la cursa. Suenter ch'el è ditg stà sin ina posiziun enturn ils 20 ha el surpassà in concurrent suenter l'auter durant las davosas duas rundas. Meglier svizzer è però stà Joris Ryf. El è daventà quart ed ha manchentà ina medaglia be per quatter secundas.
Franzos ina classa per sa sezs
La cursa dad e-mtb ch’ha cuzzà bun 50 minutas è principalmain vegnida dominada dals Franzos. Il grond favurit Jérôme Gilloux ha triumfà avant ses cumpatriot Hugo Pigeon. Cumplettà il podest sco terz ha l’American Christopher Blevins che gudogna uschia gia sia terza medaglia al campiunadi mundial 2021. Blevins era daventà campiun mundial en la cursa da short track ed ha gudagnà argient en la cursa da staffetta.
Aur per Nicole Göldi
In di suenter che Sina Frei ha gudagnà aur en il short track è Nicole Göldi daventada a Val di Sole campiunessa mundiala en la cursa dad e-mtb. La sportista dal chantun Son Gagl ha triumfà cun in avantatg da 13 secundas sin la Franzosa Laura Charles. Cumplettà il podest sco terza ha la Tudestga Sofia Wiedenroth.
Ina buna prestaziun en questa cursa han er las ulteriuras svizras mussà. Kathrin Stirnemann è vegnida 6avla cun in retard da 2:16 minutas, Andrea Waldis è vegnida 7avla cun in retard da 2:37 minutas e Nathalie Schneitter ha terminà la cursa cun in retard da passa quatter minutas sin il plaz 11. Tut en tut èn dentant be 20 mountainbikeras stadas a la partenza a questa cursa dad e-mtb ch’ha cuzzà bun 50 minutas.
