Siglir tar il cuntegn

Header

video
Sina Frei gudogna piz a cup il sprint final
Or da Sport-Clip dals 26.08.2021.
laschar ir. Durada: 1 minuta 9 Secundas.
cuntegn

CM MTB Val di Sole Sina Frei daventa emprima campiunessa mundiala da short track

Suenter argient als gieus olimpics daventa Sina Frei uss campiunessa mundiala en la cursa da short track ch’ha festivà sia premiera a Val di Sole en l’Italia.

La Turitgaisa Sina Frei è adina stada en la gruppa da testa durant las set rundas. En la davosa runda ha ella surpiglià la testa e la finala battì en in sprint final piz a cup la Brita Evie Richards che gudogna argient. Bronz gudogna la Franzosa Pauline Ferrand-Prévot.

video
Sina Frei: «Igl è stà extrem dir»
Or da Sport-Clip dals 26.08.2021.
laschar ir. Durada: 1 minuta 34 Secundas.

Buna prestaziun da las Svizras

Cun Linda Indergand e Jolanda Neff han duas ulteriuras svizras manchentà be per pauc ina medaglia en la cursa da short track ch’ha cuzzà bun 20 minutas. Indergand è vegnida quarta, duas secundas davos Sina Frei. Jolanda Neff, la campiunessa olimpica da Tokio, ha terminà la cursa sin plazza 5. Cun Alessandra Keller sco 10avla ha ina quarta svizra terminà la cursa sut ils top 10.

audio
Sina Frei gudogna aur e prevista sin la cursa dals umens
ord Actualitad dals 26.08.2021.
laschar ir. Durada: 4 minutas 28 Secundas.

Surpraisa tar ils umens

Christopher Blevins ha gudagnà a moda surprendenta la cursa da short track dals umens. L’American ha battì en in sprint final il favurit brasilian Henrique Avancini che gudogna argient ed il Tudestg Maximilian Brandl che gudogna bronz. Per Blevins èsi gia la segunda medaglia al campiunadi mundial a Val di Sole. En la cursa da staffetta avev'el gudagnà cun ses collegas d'equipa la medaglia d'argient.

Filippo Colombo sut ils top 10

Ina buna prestaziun ha er il sulet svizzer a la partenza, Filippo Colombo, mussà. Il Tessinais è vegnì 8avel cun in retard da 21 secunda sin Christopher Blevins. Nino Schurter e Mathias Flückiger han dà forfait per questa cursa da short track. Els mettan cumplainamain il focus sin la cursa roiala da cross country nua ch’omadus audan tar ils favurits da medaglia.

RTR Novitads 17:30

Artitgels legids il pli savens