Siglir tar il cuntegn

Header

video
La decisiun en la cursa da las dunnas d'elita da cross country
Or da Sport-Clip dals 28.08.2021.
laschar ir. Durada: 1 minuta 42 Secundas.
cuntegn

CM MTB Val di Sole Proxima medaglia per Sina Frei

La mountainbikera Sina Frei sa mova sin ina vaira unda da success. Suenter argient als gieus olimpics a Tokyo ed il titel da campiunessa mundiala en la cursa da short track gudogna Frei a Val di Sole era ina medaglia en la cursa da cross country. La giuvna da 24 onns vegn terza e gudogna bronz.

video
Frei: «La medaglia d'argient a Tokyo ha gidà»
Or da Sport-Clip dals 28.08.2021.
laschar ir. Durada: 1 minuta 26 Secundas.

Sina Frei ha però stuì cumbatter fitg per questa medaglia da bronz. Ella ha battì en in sprint final la campiunessa olimpica e cumpatriota Jolanda Neff ch’ha stuì sa cuntentar cun il quart plaz. Las duas svizras han mussà ina fitg buna cursa, principalmain sin las davosas rundas. La finala han ellas pers 1:08 minutas sin la nova campiunessa mundiala, la Brita Evie Richards ch’ha sco Sina Frei er pir 24 onns.

Ina buna prestaziun ha er Alessandra Keller mussà. Cun in retard da 3:20 minutas è Keller, che n’aveva betg pudì parter a Tokyo, vegnida 10avla. Linda Indergand ha terminà la cursa sco 12avla cun in retard da 4:13 minutas.

video
Neff: «Jau n'hai betg gì las meglras chommas»
Or da Sport-Clip dals 28.08.2021.
laschar ir. Durada: 1 minuta 9 Secundas.

Aur per Evie Richards

Gudagnà aur en la cursa da las dunnas d’elita da cross country ha Evie Richards. La Brita ha sin las davosas rundas distanzià l’entira concurrenza e la finala triumfà cun in avantatg da 1:03 minutas sin l’Ollandaisa Anne Terpstra. Cunquai turna er Richards a chasa cun duas medaglias. En la cursa da short track aveva ella gudagnà davos Sina Frei la medaglia d’argient. Ina terrada ha Pauline Ferrand-Prévot stuì magunar. La Franzosa e defensura dal titel è ditg stada a la testa, la finala dentant cuntanschì l’arrivada be sco 6avla cun in retard da 2:35 minutas.

Actualitad 17:00

Artitgels legids il pli savens