En il chavaltgar ston ils Svizzers sepulir il siemi d'ina medaglia en il singul dal sigl d'obstachels. Tant Martin Fuchs sco era Beat Mändli n'han betg dumagnà il percurs, dal final dals megliers 30 – senza sbagls. Omadus Svizzers han stuì nudar mintgamai duas bittadas. Martin Fuchs è vegnì 16avel Beat Mändli 26avel. Las plazzas da podest èn idas al Brit Ben Maher sco emprim, al Svedais Peder Fredricson sco segund ed al Ollandais Maikel van der Vleuten sco terz.
Steve Guerdat – il victur olimpic dal 2012 veva surprendentamain fatg in pitschen sbagl gia tar la qualificaziun e n'è perquai betg stà da la partida. Anc po il team svizzer sperar sin medaglias tar il sigl d'obstachels da team.
