Siglir tar il cuntegn

Header

video
YB na fa nagins puncts cunter Villareal
Or da Sport-Clip dals 20.10.2021.
laschar ir. Durada: 5 minutas 8 Secundas.
cuntegn

Champions League YB sto suttametter a Villareal

Igl è plitost stà ina saira d'emblidar per il campiun svizzer. Gia suenter 16 minutas èn ils da Berna stads cun 0:2 en retard – la partida era gia bunamain decidida. Mo davent da l'entschatta. YB che gioga plitost nunusità cun 5 defensur ha miserias da vegnir en la partida. Bain ha la squadra da David Wagner gì l'emprima buna schanza, dentant gia suenter 6 minutas sajettà Pino il 1:0 per il giast da Villareal. Silsuenter perdan ils Bernais in zic il fil. I suondan pliras bunas schanzas per Villareal ed en la 16avla minuta croda alura gia il 2:0 per ils Spagnols.

Il goli dad YB
Legenda: Gist 4 giadas sto Von Ballmoos prender la balla or dal gol. Keystone

Silsuenter vegn YB però adina pli ferm. En la 31avla minuta tutga Aebischer dentant sulettamain la pitga. Er suenter pausa è la partida in si e giu. Omaduas equipas han pliras bunas schanzas – il proxim gol reussescha però a Berna. Elia sajettà en la 77avla minuta il 1:2 ord vista dals Bernais. Per dapli na tanschì però betg. Anzi. Ils giasts spagnols tutgan anc duas giadas en las ultimas minutas. A la fin avess YB pudì far dapli – ils gols ha dentant Villareal sajettà.

United gudogna cunter Atalanta

Suenter la segunda terrada en seria crodan ils Bernais anavos l'ultima plazza da la tabella. Tant ils Spagnols sco er Manchester United han surpassà la squadra da David Wagner. United ha battì a chasa Atalanta Bergamo cun 3:2. Rashford, Maguire e Cristiano Ronaldo han vulvì in 0:2 ord vista dals Englais. Avant pausa avevan Pasalic e Demiral sajettà ils Bergamascs en avantatg.

Gia en duas emna gioga YB alura puspè encunter Villareal. Ch'ils Bernais pon far mal als Spagnols han els mussà, i dovra però dapli concentraziun en la defensiva.

RTR novitads 06:00

Artitgels legids il pli savens