Suenter bun 40 kilometers ha il favurit Dario Cologna pudì sa distanziar da la concurrenza. La finala ha el cuntanschì l'arrivada cun in avantatg da bunamain ina minuta sin Jason Rüesch da Tavau ch'ha battì en in sprint final Cédric Steiner e Jonas Baumann.
Ina buna cursa ha er mussà Toni Livers. Il currider oriund da Trun ch'ha terminà sia carriera avant bun in onn ha pers bun trais minutas e mez sin Cologna e cuntanschì l'arrivada sco 11avel ed 8-meglier svizzer. Avant Livers èn anc sa classads trais Tudestgs che fan era part als campiunadis svizzers a Sedrun.
Gist suenter Toni Livers ha cuntanschì l'arrivada Livio Bieler. Per il passlunghist da Panaduz èsi stà la davosa cursa da la carriera.
Fähndrich en il cumbat cun las Tudestgas
Nadine Fähndrich n'ha betg gudagnà la cursa, persuenter il titel da campiunessa svizra sur 30 kilometers en il stil classic. La pli sperta en questa cursa a Sedrun è dentant stada la Tudestga Laura Gimmler. Per Fähndrich èsi gia il 9avel titel da campiunessa svizra tar l'elita. A Sedrun ha la Lucernaisa gudagnà quest titel avant Lydia Hiernickel – ch'ha cuntanschì l'arrivada sco 6avla suenter trais ulteriuras tudestgas – ed Anja Weber.
Cla-Ursin Nufer sin il podest
Tar ils juniors han dus fragliuns procurà per la musica. Siri Wigger è daventada campiunessa svizra tar las junioras U20, quai sur 15 kilometers stil classic. Ses frar Nicola Wigger ha triumfà tar ils juniors U20 ch'èn currids 30 kilometers en il stil classic. En questa cursa ha Cla-Ursin Nufer gudagnà la medaglia d'argient. Fin la la davosa da sis rundas era Nufer anc a la testa ensemen cun Wigger. La finala ha il Tuatschin pers bun ina mesa minuta, ma è tuttina cuntent dad esser daventà vice-campiun svizzer als campiunadis svizzers tar el a chasa.
La dumengia van ils campiunadis svizzers a Sedrun a fin cun ils sprints d'equipa. Quai èn er gist las davosas cursas da la stagiun. Al sprint d'equipa parta tranter auter er Dario Cologna, quai ensemen cun ses frar Gianluca.
