Siglir tar il cuntegn

Header

cuntegn

Campiunadi svizzer da MTB Vital Albin gudogna argient tar l’elita

Il mountainbiker Vital Albin – oriund da Tersnaus – è vegnì segund en la cursa da cross country dal campiunadi svizzer a Leysin en il chantun Vad. Daventà campiun svizzer è Mathias Flückiger ch’ha uschia pudì defender ses titel. Avant in onn aveva Flückiger gudagnà a Gstaad avant Nino Schurter.

Il grond favurit Mathias Flückiger ha pudì scappar da la concurrenza gia en l’emprima da set rundas. La finala ha el triumfà suveran cun in avantatg da bunamain duas minutas sin Vital Albin che veva gia gudagnà argient en la cursa da short track dal campiunadi svizzer avant in’emna a Lugano. Cumplettà il podest sco terz ed uschia gudagnà la medaglia da bronz ha Andri Frischknecht. Il figl da la legenda Thomas Frischknecht ha pers bunamain trais minutas sin Mathias Flückiger. Per il Bernais èsi gia il terz titel suenter quel dal 2018 ed quel dal 2021.

Vital Albin
Legenda: Vital Albin persvada er al campiunadi svizzer da MTB a Leysin en il chantun Vad. mad, Kifcat

Betg stà a la partenza è Nino Schurter. L’actual campiun mundial vul sa concentrar cumplainamain sin las cursas da la cuppa mundiala. La proxima fin d’emna spetgan las cursas a Leogang en l’Austria.

Alessandra Keller nova campiunessa svizra

La cursa da las dunnas d’elita ha gudagnà Alessandra Keller, la collega d’equipa da Mathias Flückiger. Keller dal chantun Sutsilvania ha triumfà avant Linda Indergand e Sina Frei. La campiunessa olimpica Jolanda Neff ha stuì sa cuntentar cun il 6avel plaz. Neff è cupitgada duas giadas en questa cursa e n’ha silsuenter gì nagina schanza pli da defender ses titel. Neff era daventada il davos sis giadas en seria campiunessa svizra en la disciplina cross country.

Chiara Solèr da Lumbrein vegn 5avla tar las junioras

En la categoria dals umens U23 ha Simon Walter dal chantun Turgovia gudagnà aur. Janis Baumann dad Igis è vegnì 6avel. Tar las dunnas U23 ha triumfà Ronja Blöchlinger da Bienna. Ginia Caluori da Panaduz è vegnida 5avla. Er 5avla è vegnida Chiara Solèr da Lumbrein en la categoria da las junioras. En questa cursa ha triumfà l’Appenzellaisa Monique Halter avant Lea Huber ed Anina Hutter da Trimmis. Plinavant è Lorena Cadalbert da Cuira vegnida 6avla tar las junioras. Ina victoria grischuna hai dà en la categoria seniors 1. Là ha Sascha Deplazes da Mustér gudagnà.

RTR novitads 20:00

Artitgels legids il pli savens