La Finnlanda è per la quarta giada campiun mundial da hockey sin glatsch. En il final a Tampere en l'agen pajais han ils Scandinavs battì il Canada cun 4:3 suenter prolungaziun.
5 minutas avant la fin manava la Finnlanda cun 3:1. Al Canada èsi dentant anc reussì d'egualisar e sfurzar ina prolungaziun. En la 7avla minuta da la prolungaziun ha Sakari Manninen sajettà il gol da la victoria per la Finnlanda.
Il favrer era la Finnlanda gia daventada campiun olimpic a Peking.
Rang 3 è ì a la Tschechia. En il final pitschen han ils Tschechs battì ils Stadis unids cun 8:4.
Puspè out en il quartfinal
Per la Svizra è aventura dal campiunadi mundial da hockey sin glatsch a fin suenter il quartfinal. La squadra dal trenader Patrick Fischer perda cunter ils Stadis Unids cun 0:3. Ils Americans han fatg dus gols en l'emprim terz. Fin la fin da la partida n'èsi betg gartegià als Svizzers da prender suenter quest retard. Plinavant ha mancà Enzo Corvi: L'attatgader grischun è crudà en la banda suenter il check ed ha stuì bandunar il glatsch.
Dapi l'onn 2000 è la Svizra sa qualifitgada 13 giadas per ils quartfinals, dentant ha ella mo gudagnà dus da quels, numnadamain il 2013 en Svezia ed il 2018 en il Danemarc – omaduas giadas han ils Svizzers lura cuntanschì il final e gudagnà la medaglia d'argient.
Ils ulteriurs resultats dals quartfinals:
- Germania – Tschechia 1:4
- Svezia – Canada 3:4 suenter prolungaziun
- Finlanda – Slovachia 4:2
La fasa da gruppa ha la Svizra dominà e gudagnà tut ils set gieus.
7. gieu: Victoria suenter penaltis
Er en il setavel gieu da gruppa ha l'equipa da Patrick Fischer fatg bler endretg e gudagnà il gieu cunter la Germania suenter sajettar penaltis cun 4:3. Suenter il temp regular eri pari 3:3, ils penaltis han stuì decider la partida. Uschia èn ils Svizzers sa qualifitgads da moda suverana sco victura da gruppa per il gieu da quartfinal.
6. gieu: Proxima victoria cunter la Frantscha
A la naziunala svizra da hockey manca be anc in punct al campiunadi mundial en Finlanda, per restar a la testa da lur gruppa A. Suenter la victoria cun 6:3 encunter il Canada, han els battì la Frantscha cun 5:2, quai suenter ch'ils Svizzers èn stads l'entschatta dal gieu 0:2 en retard.
5. gieu: Victoria spectaculara cunter il Canada
La naziunala Svizra ha gudagnà cun 6:3 encunter il campiun mundial da record, il Canada. Gia avant il gieu era cler che l'equipa da Patrick Fischer cuntanschia il quartfinal, perquai ch'il Danemarc aveva battì la Frantscha cun 3:0.
Per Andres Ambühl hai dà dubla raschun per festivar. Tar la victoria encunter il Canada ha il Grischun rut il record cun ses 120avel gieu ad in campiunadi mundial. Quai restia en memoria e saja ina fin perfetga per quest di.
4. gieu: La quarta victoria cunter la Slovachia
La squadra naziunala svizra ha gudagnà cun 5:3 cunter la Slovachia – malgrà blers chastis e blers sbagls. Uschia ha il team da Patrick Fischer era suenter la quarta partida il dumber maximal da puncts en la gruppa A, numnadamain 12 puncts.
3. gieu: Svizra gudogna cunter Kasachstan
La squadra naziunala svizra gudogna è la terza partida al campiunadi mundial a Helsinki en Finlanda. Il team da Patrick Fischer ha battì ils Kasacs cun 3:2. Ils Svizzers han bain dominà la partida - l'emprim gol è però pir crudà en il segund terz grazia a Denis Malgin. Cunquai ha la squadra naziunala fin ussa gudagnà tut ils trais gieus.
2. gieu: Svizra declassescha il Danemarc
Er sia segunda partida da gruppa al campiunadi mundial en Finlanda, ha la Svizra gudagnà, questa giada encunter il Danemarc. Dumengia saira ha la squadra dal trenader Patrick Fischer battì il Danemarc gist cun 6:0. La Svizra è uschia per il mument ensemen cun ils Canadais, cun il maximum da puncts al timun da la gruppa A.
1. gieu: Svizra gudogna cunter l'Italia
La Svizra ha gudagnà sia emprima partida al campiunadi mundial da hockey a Helsinki. Il team dal trenader Fischer ha gudagnà la partida cunter l'Italia cun 5:2. Malgin ha gia fatg l'emprim gol suenter 49 secundas. Ils ulteriurs gols han fatg Thürkauf (2), Ambühl e Hischier. Ils Talians han fatg ils gols en la davosa part dal gieu.
