La Finlanda ha gudagnà sia premiera ad in campiunadi europeic. Quai a Copenhagen cunter il Danemarc cun 1:0.
Giugader collabà sin il plaz
La partida da gruppa è vegnida interruta en la 43avla minuta. Il giugader danais Christian Eriksen è cruda ensemen sin il plaz. Sanitaris han stuì exequir mesiras immediatas da salvament. Il Danais è vegnì transportà or dal stadion. En il mument sa chatta il giugader en l'ospital. Eriksen è alert e sia situaziun è sa stabilisada. El resta en l'ospital per ulteriurs scleriments. La partida è vegnida cuntinuada a las 20:30.
L'equipa naziunala dal Danemarc ha entant spustà il trenament da dumengia ed er ditg giu tuttas activitads da medias. Vitiers offrescha la federaziun danaisa agid psicologic als ballapedists. Quai ha ella communitgà suenter la terrada da 0:1 cunter la Finlanda.
Belgia-Russia 3:0
En l'ulteriura partida da la saira ha la Belgia gudagnà cunter la Russia a Son Petersburg cleramain cun 3:0. Ils giasts han dominà la partida davent da l'entschatta. Romelu Lukaku ha sajettà il 1:0 en la dieschavla minuta. Thomas Meunier ha augmentà enl a 34avla minuta sin 2:0 per ils Beltgs. En l'89avla minuta ha Lukaku sajettà ses segund gol da la partida al resultat final da 3:0.
