Siglir tar il cuntegn

Header

video
Discurs cun Vital Albin avant sia cursa da cross-country al campiunadi europeic a Minca
Or da Giuventetgna dals 18.08.2022.
laschar ir. Durada: 12 minutas 23 Secundas.
cuntegn

Campiunadi europeic a Minca Vital Albin enavos a la lingia da partenza

In mais ditg è il mountainbiker da Tersnaus stà davent – quai pervia da corona. Suenter la cuppa mundiala ad Andorra mez fanadur è Vital Albin vegnì malsaun. Al campiunadi europeic a Minca dat el ses comeback en la cursa da cross-country.

audio
Vital Albin parta sco in dals trumfs svizzers a Minca
ord Actualitad dals 19.08.2022.
laschar ir. Durada: 2 minutas 57 Secundas.

Avant sia infecziun da corona era Vital Albin en la meglra furma da la vita. Ad Andorra è el schizunt daventà 6avel en la cursa da cross-country. Fin oz il meglier resultat da la carriera. Silsuenter ha corona franà il mountainbiker da 24 onns. El ha uschia er stuì laschar ora las cursas da la cuppa mundiala a Snowshoe en ils Stadis Unids ed a Mont-Sainte-Anne en il Canada.

Jau dun il meglier pussibel, ma jau na vom betg a la partenza cun grondas finamiras.
Autur: Vital Albin mountainbiker

Tenor ils resultats dals davos tests en il trenament è Vital Albin puspè là nua ch’el era avant che vegnir malsaun. Mo trenament e cursa èn duas differentas chaussas. Tuttina, avess tut da gartegiar sco giavischà auda il Lumnezian schizunt tar in candidat da medaglia a Minca, er perquai che plirs favurits n’èn betg a la partenza sco Nino Schurter u Mathias Flückiger. Vital Albin è davos il Tessinais Filippo Colombo uss il grond trumf svizzer.

Focus sin campiunadi mundial

Per Vital Albin è la cursa dal campiunadi d’Europa a Minca però er ina cursa da preparaziun sin la cursa dal campiunadi mundial che suonda en bun in’emna a Les Gets en Frantscha. Il campiunadi mundial è il punct culminant da la stagiun e per il mountainbiker da Tersnaus in dals puncts culminants insumma en sia anc giuvna carriera.

Actualitad 11:00

Artitgels legids il pli savens