Siglir tar il cuntegn

Header

cuntegn

Bilantscha intermediara La Svizra brigliescha a Tokio – surtut las Svizras

Gudagnar almain 7 medaglias olimpicas a Tokio; Quai è stà la finamira da Swiss Olympic. Suenter 1 emna – ed uschia la mesadad dals gieus olimpics – han atletas ed atlets svizzers gia 10 medaglias, 3 da questas dad aur. Quai è gia ussa las pli bleras medaglias dapi ils gieus olimpics il 1952 a Helsinki (14 medaglias).

Ed ina 11avla medaglia è gia pronta: En il final dubel da tennis da las dunnas cumbattan Belinda Bencic e Viktorija Golubic per aur ubain argient. Surtut las atletas svizras han briglià enfin uss a Tokio e gudagnà las trais medaglias d'aur: Belinda Bencic en il tennis singul, Jolanda Neff en la cursa da mountainbike e Nina Christen en il sajettar cun il caliber pitschen. Sper quai aveva Nina Christen gia sajettà bronz sin 10 meters. Cun la victoria traidubla svizra en il mountainbike han Jolanda Neff, Sina Frei e Linda Indergand era scrit istorgia.

Per il mountainbiker Mathias Flückiger ha il cross-country purtà argient e la ciclista Marlen Reusser è ida per argient en la cursa cunter l'ura.

Cun duas medaglias da bronz en nudar da Jérémy Desplanches da Genevra ed il Tessinais Noè Ponti ha la Svizra era scrit istorgia en in sport, nua che la concurrenza internaziunala è enorm gronda.

audio
Bilantscha intermediara suenter la mesadad dals gieus olimpics
ord RTR Audio dals 31.07.2021.
laschar ir. Durada: 7 minutas 7 Secundas.
Andreas Wieland

Andreas Wieland

Redactur sport

Avrir la boxa da profil Serrar la boxa da profil

Andreas Wieland rapporta e commentescha per RTR eveniments e concurrenzas da sport.

Grondiusas prestaziuns senza medaglias

Cun Nino Schurter en il mountainbike e Stefan Küng en la cursa da velo cunter l’ura han dus ciclists manchentà be per pauc ina medaglia. Gist al ciclist Stefan Küng han mancà sulet quatter dieschavels per bronz.

Ina grondiusa prestaziun ha er Nicola Spirig mussà en il triatlon. En la vegliadetgna da 39 onns, ed essend mamma da 3 uffants, è la campiunessa olimpica dal 2012 vegnida a Tokio 6avla. Ella ha uschia gudagnà in diplom olimpic.

Persvadì han er ils umens en il sport da gimnastica. En la concurrenza d’equipa è il quartet svizzer cun Pablo Brägger, Christian Baumann, Benjamin Gischard ed Eddy Yusof vegnì 6avel ed ha uschia er fatg surstar las grondas naziuns sco la Russia, la China u il Giapun.

E procurà per in mument istoric han las duas sprintras Ajla Del Ponte e Mujinga Kambundji. Omaduas han cuntanschì il final dal sprint da 100 meters e terminà quel sin ils plazs 5 e 6.

Actualitad 17:00 uras

Artitgels legids il pli savens