Tar cundiziuns extremas cun blera buglia ha Nino Schurter pers 38 secundas sin Lars Forster ch’è vegnì da sa distanziar en la quarta da tschintg rundas ed ha er profità da sias qualitads sco ciclist champester. Cumplettà il podest sco terz ha Andri Frischknecht (+1:16 minutas), uschia ch’i ha dà in podest cun trais mountainbikers da l’equipa Scott-Sram MTB Racing Team, l’equipa da Thomas Frischknecht. Vital Albin ha pers 3:44 minutas ed ha terminà la cursa sco 5avel.
Il classament general da Bike Revolution ha gudagnà il Franzos Titouan Carod, avant Vital Albin e Lars Forster. Carod gudogna uschia ina premia da 5'000 francs, Albin ina premia da 3'000 francs e Forster ina premia da 2'000 francs.
Cadalbert terza e Solèr 5avla
En la cursa da las dunnas d’elita n’è ina gia dapli nagina vegnida da franar la Franzosa Pauline Ferrand-Prévot. La campiunessa mundiala ha triumfà suveran avant la Svizra Alessandra Keller (+2:51 minutas). Terza è vegnida la Svizra Sina Frei (+4:19 mintas).
La cursa da las dunnas U19 ha gudagnà a moda suverana Monique Halter avant Lea Huber e Lorena Cadalbert da Cuira. La Lumneziana Chiara Solèr è vegnida 5avla. La cursa dals umens U19 ha gudagnà Romano Püntener dal Principadi dal Liechtenstein.
Stagiun da Nino Schurter a fin
La cursa da Bike Revolution è stada la terza e davosa da questa seria. L’emprima cursa ha gì lieu la fin mars a Tamaro en il Tessin, la segunda lura la vin avrigl a Cuira en la patria da Nino Schurter ch’ha a Huttwil terminà sia stagiun 2022 da mountainbike. Er l'onn proxim vegni a dar la seria da cursas Bike Revolution, il 2023 però cun tschintg cursas.