Per Nevin Galmarini ch’è vegnì fit il pli davos mument sin quests gieus olimpics èsi in’ulteriura frida en questa stagiun. L’emprim ha el patì da problems cun il dies ed il schaner anc stà infectà cun il coronavirus ed uschia er manchentà la cursa da la cuppa mundiala da chasa a Scuol. En la davosa cursa avant ils gieus olimpics, pia l'emprova generala per quest punct culminant a Peking, aveva Galmarini dentant manchentà ses emprim podest en questa stagiun be per pauc sco quart.
Tuttina in Grischun en l'otgavelfinal
Il sulet svizzer ch’ha dumagnà la qualificaziun è Dario Caviezel da Cuira sco 14avel. En l'otgavelfinal èsi lura stà finì er per el. El ha pers cunter l'Austriac Andreas Prommegger.
A fin è la cursa stada en la qualificaziun per Gian Casanova oriund da Walenstadt ch’ha stuì sa cuntentar be cun il 28avel plaz.
Zogg e Kummer han era betg gì success
Er per las dunnas èsi stà a fin en ils otgavelfinals. Julie Zogg ha mo gì otg tschientavels retard sin la Tudestga Langenhorst. Patrizia Kummer ha stuì ceder cunter l'Austriaca Dujmovits.
Ladina Jenny e Jessica Keisser han manchentà la qualificaziun per ils finals.
Ord l'archiv:
Il 2018 a Pyeongchang, ha Galmarini fatg la medaglia d'aur.