Siglir tar il cuntegn

Header

cuntegn

Beachvolley Heidrich / Vergé-Dépré en il mezfinal

Joana Heidrich ed Anouk Vergé-Dépré pon siemiar vinavant d'ina medaglia als gieus olimpics. Il duo svizzer dal beachvolleyball stat suenter ina buna prestaziun durant in di chalira en il mezfinal.

En il quartfinal han as duas dunnas battì las Brasilianas Ana Patricia/Rebecca en 65 minutas cun 21:19, 18:21 e 15:12. L'emprim set è stà l'entschatta fitg gulivà, enfin tar il 9:9. Lura èn las duas Svizras vegnidas sin dapli distanza cun 14:10. Er tar 20:16 han las campiunessas europeicas anc adina gì avunda distanza. Tuttina èsi anc ina giada vegnì cnap vers fin.

Il segund set è ì l'entschatta medemamain vi e nà, lura èn las Svizras vegnidas en retard e las Brasilianas han pudì trair davent. Suenter in timeout èsi lura stà ina clera chaussa per las Brasilianas.

En il tiebreak han las Svizras puspè cumenzà meglier. 10:6 èn ellas stadas ordavant. Ma cun in 10:9 han ellas prendì in timeout. Quel ha gidà las Svizras da sa focussar da nov. En la fasa decisiva han ellas pudì mantegnair la gnerva. Ultra da quai ha Ana Patricia fatg sbagls en la fasa decisiva en la partida dira durant gronda chalira. Quella n'ha ella betg vertì bain. Tar las intervistas suenter il gieu è ella vegnida stuschada en ina sutga da rodas.

RTR novitads 06:00

Artitgels legids il pli savens