3. liga
Per l'emprima giada dapi blers onns dattan puspè trais equipas rumantschas en la 3. liga. Sper il CB Trun/Rabius èn da nov er il CB Lumnezia ed il CB Surses part da la 3. liga. Pervia d'ina restructuraziun tar la Federaziun da ballape da la Svizra orientala hai dà inqual midada en la gruppa 1 da la 3. liga. Equipas sco Triesen, Triesenberg u Buchs na tutgan betg pli tar questa gruppa. Perencunter èn da nov Uznach, Glaruna u Eschenbach da la partida. Quant fermas che questas equipas èn, vegn il decurs da la stagiun a mussar.
Il favurit sin la promoziun en 2. liga è probabel Bogn Ragaz, che ha manchentà l'ultima stagiun la promoziun mo per il nair da l'ungla. Bler dastgan ins dentant er spetgar da Eschenbach – che ha suenter la relegaziun en 3. liga segir puspè la finamira da dumagnar la promoziun ensi.
Tge dastgan ins spetgar da las equipas rumantschas?
Il pli bler dastgan ins segir spetgar da Trun/Rabius che dat la terza stagiun en seria en 3. liga. L'ultima stagiun ha l'equipa da la Cadi evità la relegaziun pir en il davos gieu da campiunadi. Quest onn ston las finamiras esser pli autas. La qualitad è segir quà da far in plaz en l'emprima mesadad da la tabella. La finamira da l'equipa è er da dar in ballape pli offensiv questa stagiun ch'ils ultims onns.
La finamira principala da las ulteriuras equipas rumantschas sto esser da tegnair la liga. Il CB Lumnezia cumbatta cun problems enconuschents: Sco gia auters onns è il cader fitg pitschen. Blessuras u giugadurs serrads na po l'equipa strusch vertir. Cun Yanick Demont ha plinavant il topscorer da l'equipa terminà sia carriera. En la preparaziun han ils Lumnezians stuì dar forfait il gieu da Cuppa grischuna sco er da la Cuppa svizra, pervi da memia paucs giugaders.
Spannegià dastgan ins esser sin il CB Surses che dat per l'emprima giada insumma en la 3. liga. En la preparaziun ha l'equipa surmirana fatg ina buna figura. Tuttas partidas han els gudagnà. Tranter auter dus gieus da la Cuppa svizra. Tuttina èsi da quintar che Surses sto cumbatter cunter la relegaziun. Dumagnar questa sfida è mo pussaivel sco equipa omogena.
2. liga regiunala
Cun il CB Domat e la US Schluein Glion dattan duas equipas grischunas quest onn en la 2. liga regiunala. Il CB Domat ha dumagnà la promoziun e dat uschia per l'emprima giada dapi la stagiun 2017/2018 en la 2. liga. Per Schluein Glion èsi la terza stagiun en roda en la 2. liga.
Tge dastgan ins spetgar da las equipas grischunas?
Per Schluein Glion vegn er questa stagiun in cumbat cunter la relegaziun. Insatge che l'equipa da Mate Lekishvili enconuscha avunda bain. L'ultima stagiun han ils Sursilvans segirà la classa pir grazia ad ina victoria en l'ultim gieu. Sin la nova stagiun hai dà inqual midada en il cader da Schluein. L'equipa giuvna è anc vegnida pli giuvna. Tranter auter ha il goli David Hornacek midà tar Cuira 97. Ina sfida per Schluein Glion vegn ad esser dad integrar ils novs giugaders en l'equipa, e da purtar quests giugaders sin nivel da la 2. liga.
Il CB Domat perencunter na vul betg avair da far insatge cun la relegaziun. L'equipa è per gronda part la medema sco la stagiun passada, e singuls giugaders èn anc vegnids vitiers. La finamira da l'equipa dal trenader Walter Frizzoni è in plaz amez la tabella.
2. liga interregiunala
Cuira 97 va sco meglra equipa grischuna en in'ulteriura stagiun en la 2. liga interregiunala. Sco mintg'onn hai era questa stagiun dà inqual midada en il cader. Betg pli part da l'equipa fa tranter auter Fabrizio Cavegn. Il giuven talent sursilvan dat da nov tar il FC Son Gagl. Nov en il cader èn spezialmain giugaders giuvens. Franc è che Cuira 97 na tutga betg tar ils topfavurits en quest campiunadi.
Tge dastgan ins spetgar da Cuira 97?
Cuira 97 ha mussà ils ultims onns ch'èls tutgan tar l'elita en la 2. liga interregiunala. La stagiun 2019/2020 eran els sin plazza 1, cura che la stagiun è vegnida interruta ed annullada pervi dal coronavirus. L'ultim campiunadi ha l'equipa da la chapitala grischuna finì sin plazza 5 da la tabella.
Sin Cuira 97 spetga tenor il trenader Maximilian Knuth, ina stagiun da transiziun. Els hajan gì ina greva preparaziun. Blers giugaders hajan adina puspè mancà pervia da vacanzas u blessuras. Perquai saja bler malguess avant il cumenzament dal nov campiunadi. La finamira saja ina plazza en l'emprim terz da la tabella. La promoziun en la 1. liga n'è actualmain nagin tema. Spezialmain da giugaders giuvens sco Lars Caduff e Marino Cavegn spetga Maximilian Knuth uss dentant il proxim pass.
