Siglir tar il cuntegn

Header

video
Finamiras schanzas e sfidas per Trun/Rabius, Lumnezia e Surses
Or da Giuventetgna dals 24.03.2022.
laschar ir. Durada: 23 minutas 23 Secundas.
cuntegn

Ballape regiunal 3. liga Auter che Trun/Rabius ston Surses e Lumnezia tremblar

La pausa d’enviern e la fasa da preparaziun èn a fin. La fin d’emna cuntinuescha il campiunadi da ballape en las ligas regiunalas. I spetga la runda da primavaira. En 3. liga cumbattan il CB Surses ed il CB Lumnezia cunter la relegaziun, il CB Trun/Rabius s’orientescha vers in plaz sisum la tabella.

Las trais equipas rumantschas en terza liga èn prontas per la runda da primavaira e sa legran ch’i va puspè liber cun gieus da campiunadi nua che mintga gol e mintga punct quinta. Durant ch’il CB Trun/Rabius ha fatg in camp da trenament al Lai da Garda ed il CB Surses en il Tirol da Sid è il CB Lumnezia per ina giada stà a chasa, era ord motivs da corona.

audio
Runda da primavaira va liber per il ballape regiunal
ord Actualitad dals 25.03.2022.
laschar ir. Durada: 4 minutas 9 Secundas.

Surses e Lumnezia a la chatscha da puncts

Suenter la runda d’atun è il CB Trun/Rabius cun ses trenaders Donat Albin e Philippe Vincenz, ch’han abditgà per la fin da la stagiun, sin il setavel plaz da la tabella ed uschia en ina situaziun confortabla.

Auter la situaziun tar il CB Surses, ch’ha gudagnà be dus gieus durant la runda d’atun e che sa chatta gist sur il stritg da la tabella en lur emprima stagiun en terza liga. Anc mender èsi ì als Lumnezians, ch’han gudagnà be in punct durant ils emprims 11 gieus e dovran urgentamain puncts ils proxims mais per betg stuair far il pass enavos en la quarta liga.

Mez matg spetga il temp da derbis

Gudagnar puncts vulan las trais equipas principalmain mez matg, lura spetga la fasa da derbis. Entaifer be duas emnas fruntan las trais equipas rumantschas ina sin l’autra. Il CB Surses ha la finamira da vilentar ils Sursilvans – Lumnezia vul mussar ch’els han merità dad esser in’equipa da terza liga. Trun/Rabius vul principalmain far revantscha a chasa encunter Surses suenter la terrada dad 1:2 en il Grischun Central la fin settember 2021.

RTR actualitad 07:00

Artitgels legids il pli savens