Ils Lusitanos de Samedan èn ina equipa da ballape che sa cumpona da giugaders cun ragischs portugaisas. La diaspora portugaisa en Engiadina è fitg gronda. Da lur patria iberica han ils portugais e las portugaisas segira purtà l’entusiassem per il ballape en Engiadina. Perquai èsi per els er cler:
Nus vulain turnar en la quarta liga, là è nossa plazza
Las premissas per far quel pass a la fin da la runda da primavaira èn intactas. Ils Lusitanos cumenzan la segunda mesadad dal champiunadi sin plazza dus da la tabella. Il retard sin il leader Tavau emporta be tschintg puncts. Cun ina buna runda da primavaira pudessil FC Lusitanos de Samedan puspè turnar en quarta liga. Sch’ins resguarda il talent da l’equipa è quai er la liga, nua che la squadra engiadinaisa tutga.