Max Verstappen gudogna per l'emprima giada il Grond Premi da Canada. Per il pilot da Red Bull è quai la 6avla victoria en questa stagiun. Verstappen ha gudagnà a Montreal cnap avant Carlos Sainz en Ferrari. Il pilot da Mercedes Lewis Hamilton cumpletescha il podest. Il team dad Alfa Romeo turna a chasa cun intgins puncts dapli sin il conto. Valtteri Bottas è vegnì 8avel Zhou Guanyu 9avel.
Verstappen dominescha qualifying – Leclerc parta sco 19avel
Max Verstappen en Red Bull parta da la pole position en il Grond Premi dal Canada a Montreal. Dasper l'Ollandais stat surprendentamain il Spagnol Fernando Alonso en Alpine. Per il campiun dubel èsi l'emprima giada dapi 10 onns ch'el parta ord l'emprima retscha en in Grond Premi. Ord la segunda retscha partan Carlos Sainz en Ferrari e Lewis Hamilton en Mercedes. Guanyu Zhou e Valtteri Bottas en Alfa partan dal 10avel respectivamain 11avel plaz.
Leclerc be dal 19avel plaz
Ina gronda sfida vegn la cursa ad esser per Charles Leclerc che parta dal 19avel plaz en la cursa, cunquai ch'il motor da ses Ferrari ha stuì vegnir remplazzà. Per il Monegass è quest handicap da partenza in ulteriur culp en il cumbat per il titel. Bain è el partì las ultimas quatter cursas da la poleposition, dentant n’ha el gudagnà naginas da quellas cursas; duas giadas n’ha el gnanc terminà la cursa. Uschia è Leclerc be pli terz dal classament general cun in retard da gia 34 puncts sin il campiun mundial actual Max Verstappen en Red Bull.
Pervi da la pandemia da corona n'ha il Grond Premi dal Canada betg gì lieu ils ultims dus onns. L'ultima cursa a Montreal ha gudagnà Lewis Hamilton il 2019. Ensemen cun Michael Schumacher tegna el er il record da victorias sin questa pista. Omadus han gudagnà la cursa mintgamai set giadas.
La cursa sin il Circuit Gilles Villeneuve cumenza questa saira a las 20:00 temp svizzer.
