- Iivo Niskanen è campiun olimpic sur ils 15 kilometers classic. Il Finlandais gudogna avant il Russ Alexander Bolschunow ed il Norvegiais Johannes Hösflot Klaebo.
- Jonas Baumann vegn sco meglier Svizzer 16avel.
- Dario Cologna perda 3:45 minutas sin Niskanen e vegn be 44avel.
Dario Cologna, campiun olimpic da la distanza da 15 kilometers il 2010 a Vancouver (skating), il 2014 a Sotschi (classic) ed il 2018 a Pyeongchang (skating) n'ha gì nagina schanza a Peking. Be sin ils emprims kilometers ha l'atlet da 35 onns pudì persvader. Suenter la mesadad da la cursa era Cologna dentant crudà enavos sin il 30avel plaz cun in dischavantatg da 1:33 minutas sin la testa – a la fin muncavan schizun 3:45 minutas sin il nov campiun olimpic Iivo Niskanen, il grond spezialist dal stil classic che veva gia gudagnà bronz en il skiatlon.
Ina buna cursa da Baumann
Ina buna prestaziun ha mussà Jonas Baumann. Il passlunghist oriund da Lon en la Val Schons è currì constant ed ha la finala gì in retard da 2:15 minutas sin il victur. Suenter il 15avel plaz en il skiatlon hai tanschì quella giada per il plaz 16. Nagina schanza ha perencunter Jason Rüesch gì. Il currider da Tavau ha stuì sa cuntentar cun il 53avel plaz.
Niskanen ina classa per sasez
Gudagnà aur ha il grond favurit Iivo Niskanen. Il spezialist dal stil classic classic da la Finlanda ha gia gì suenter 3 kilometers in avantatg da 10 secundas sin ses concurrents. L'emprim ha Il Russ Alexander Bolschunow anc pudì star a pèr – ha lura dentant stuì sa cuntentar cun plazza 2, e quai cun in retard da 23 secundas. En il skiatlon aveva Bolschunow anc battì Niskanen e gudagnà aur. Terz è daventà il campiun olimpic dal sprint, Johannes Kläbo da la Norvegia.
