Serps

En il Grischun datti 7 sorts da serps e da quellas èn duas da tissi. Las autras n’èn betg privlusas. E co sa mova la serp?

Cura c'i vegn chaud cumenzan era las serps a vegnir ord lur zups. Ellas giaudan il sulegl e sa stgaudan. Ina serp è numnadamain mo svelta sch'ella ha chaud. En il Grischun datti 7 sorts da serps e da quellas èn mo duas da tissi. Las autras n'èn betg privlusas.

Laschar ir video «Co reagir sch'ins vesa ina serp»

Co reagir sch'ins vesa ina serp

3:40 min, Minisguard Plus dals 5.6.2015

Natra grischa (Ringelnatter)

Natra grischa

Legenda da maletgs: Natra grischa Wikipedia

Grondezza:
mastgel fin 100 cm, femna fin 130 cm
Vegliadetgna:
20 fin 25 onns
Privel:
La Natra grischa n’è betg ina serp da tissi
Spazi da viver:
Sper auals u puzs circumdads da plantas. Impurtant èn era plantas veglias cun ragischs che furman pitschnas taunas per metter ils ovs u per star l’enviern.

La Natra grischa è la serp ch’è il pli derasada tar nus ed insumma en l’entira Europa. Ella ha dus flatgs clers en furma d’ina mesa glina davos il chau. Natras grischas pon avair differentas colurs. Lur corp po esser cotschen-brins, verd-uliva cun flatgs u strivlass stgiras. Il venter è alv-grisch cun flatgs.

Ella mangia oravant tut rustgs, peschs e mieurs. La Natra grischa maglia ils animals entirs ed entratgs cun il chau avant e quai mo sch’ils animals vivan anc.

Ina serp metta 11 fin 40 ovs. Suenter 8 fin 10 emnas sortan las pitschnas serps or dals ovs. Ellas pon gia sezzas tschertgar da magliar e na dovran betg la mamma.

Natra glischa (Schlingnatter, Glattnatter)

Natra glischa

Legenda da maletgs: Natra glischa Wikipedia

Grondezza:
fin 60 fin 75 cm
Pais:
50 fin 60 grams
Vegliadetgna:
fin 20 onns
Privel:
La Natra glischa n’è betg ina serp da tissi

Spazi da viver:
En lieus che vegnan spert chauds. Tar nus èn quai oravant tut lieus cun blera crappa u grippa. Quella po il sulegl stgaudar spert.

La Natra glischa è la pli pitschna sort da serps che viva tar nus. La colur po variar da grisch, brin, verd-uliva fin brin-cotschen u prest mellen. Per il pli han ellas flatgs stgirs sin l’entir corp. Sin il chau ha la Natra glischa adina in flatg en furma d’in triangul. Il venter n’ha nagins flatgs ed è nair u brin.

Orvettas e luschards èn la mangiativa preferida da la Natra glischa. Ma ella maglia schizunt autras serps.

Sa defender na po la Natra glischa betg. Ella po bain morder, ma la morsa n’è betg privlusa e betg tissientada. La serp sa fida ordavant tut da sia colur e muster sin la pel che fa ch’ins na vesa prest betg ella en la natira.

Natra gritta (Zornnatter)

Natra gritta

Legenda da maletgs: Natra gritta Wikipedia

Grondezza:
fin 200 cm

Vegliadetgna:
fin 30 onns

Privel:
La Natra gritta n’è betg ina serp da tissi

Spazi da viver:
Lieus umids cun blera crappa e chagliom sco per exempel en guauds da figlia e sper flums.

La Natra gritta è per il pli naira, stgir-verda, stgir-brina cun fatgs mellens. Ils flatgs mellens furman savens in muster da strivlas. Il venter è mellen-alv u grisch.

Sia preda piglia ella cun sia bucca che cuntegna blers dents ch’èn drizzads vers anen. La serp sa zulla enturn la preda e strangla quella. Raunas maglia la serp per il pli vivas, perquai che quellas èn memia glischas per stranglar. Vinavant mangia ella utschels u per exempel ratuns.

La serp attatga umans mo sch’ella n’ha nagina pussaivladad da fugir. Sia morsa n’è betg da tissi. Perquai tanschi da dischinfectar la plaja.

La serp metta 5 fin 15 ovs. Ord quels sortan 6 fin 8 emnas pli tard pitschnas serps. Il chau da quellas è mellen-nair e fan endament ad ina vespa. Quai ha in effect da defensiun. Pertge sa defender na pon las pitschnas serps betg.

Natra d'esculap (Äskulapnatter)

Natra d'esculap

Legenda da maletgs: Natra d'esculap Wikipedia

Grondezza:
fin 150 cm

Pais:
tranter 250 e 350 gr.

Vegliadetgna:
fin 30 onns

Privel:
La Natra d’esculap n’è betg ina serp da tissi

Spazi da viver:
Lieus sitgs sco per exempel en guauds maschadads (cun plantas da figlia e guglias), lieus cun blera crappa u grippa.

La Natra d’esculap datti en il Grischun mo en paucs lieus en il sid dal chantun. Ella sa ruschna betg mo par terra, mabain po era raiver sin plantas. Uschia po ella magliar ovs d’utschels u lura era ils utschels pitschens en ils gnieus. Ella maglia dentant era mieurs, luschards u rustgs.

Sch’ins piglia ina Natra d’esculap, lura morda ella adina. La morsa n’è dentant betg privlusa perquai che la serp n’ha nagin tissi. La serp na tema betg ils umans. Sch’ella sa senta en privel, lura po ella laschar ora in secret che toffa ferm e che stgatscha ils inimis.

Natra quadrigliada (Würfelnatter)

Natra quadrigliada

Legenda da maletgs: Natra quadrigliada Wikipedia

Grondezza:
femnas fin 130 cm, mastgels fin 70 cm

Vegliadetgna:
fin 26 onns

Privel:
La Natra quadrigliada n’è betg ina serp da tissi

Spazi da viver:
Sper auals che curran plaun u puzs, rivas cun blera crappa e cun bler sulegl. Sur 500 meters sur mar è ella strusch da vesair.

Il num ha la Natra quadrigliada da ses muster da flatgs ch’ella ha sin ses dies. La colur po variar, sco tar las bleras serps. Il pli bler èn ellas dentant grischas u beschas. En il Grischun ves’ins ellas mo en il Mesauc u en il sid dal Puschlav. Sin il venter da la serp èn en general flatgs.

La Natra quadrigliada na morda betg. Ella sa scufla, sibla e sigla envers l’inimi, quai dentant cun bucca serrada. Sche quai na tanscha betg lura svida ella sias glondas cun in liquid che toffa u sa zulla en ses agen cac. Uschia na pon ses inimis betg magliar ella. In’autra tactica è da sa volver en dies avrir la bucca e laschar pender ora la lieunga, sco sch’ella fiss morta.

Il pli savens mangia la Natra quadrigliada peschs. Ella sa nudar e po star ditg sut l’aua. Uschia po ella spetgar là sin sia preda.

Vipra cruschada (Kreuzotter)

Vipra cruschada

Legenda da maletgs: Vipra cruschada Wikipedia

Grondezza:
fin 60 cm

Vegliadetgna:
Fin 15 onns

Privel:
Ina morsa da la Vipra cruschada n’è per ordinari betg mortala, ma i è en mintga cas d’ir tar in medi.

Spazi da viver:
Sa sentan bain in pau dapertut. Palids u prads umids cun chaglioms als urs da guauds u en enclars. Principal è ch’ils lieus han intginas uras per di sulegl.

Il num ha la Vipra cruschada da ses muster sin il dies. In tschert muster nair da ziczac. Ils mastgels èn per il pli grischs fin grisch-brins. Las femnas èn plitost mellen-brin fin brin. Il venter ha flatgs clers.

Las pupillas da la Vipra cruschada èn sco in stritg vertical. Tar serps che n’han nagin tissi èn las pupillas radundas. Cun il tissi po la Vipra cruschada mazzar sia preda. In morsa tanscha. L’animal mors mora aifer in per minutas. Sche la preda vegn anc da fugir in toc, lura po la serp suandar il fried da l’animal.

Il pli gugent maglian las Vipras cruschadas mieurs e pitschnas mustailas. Ellas maglian dentant era pitschens utschels u luschards.

Ina Vipra cruschada metta 5 fin 18 ovs. Las pitschnas serps creschan dentant gia en ils ovs ch’èn en il venter da la mamma. Cura che lezza metta ils ovs va quai mo in per paucas minutas e las serps sortan or da la crosa. Quellas cumenzan gia suenter curt temp ad ir a la chatscha da predas.

Vipra dal Giura (Aspisviper)

Vipra dal Giura

Legenda da maletgs: Vipra dal Giura Wikipedia

Grondezza:
fin 70 cm

Vegliadetgna:
almain 20 onns

Privel:
Ina morsa da la Vipra dal Giura n’è per ordinari betg mortala, ma i è en mintga cas d’ir tar in medi.

Spazi da viver:
Sin spundas exponidas vers sid, cun blera crappa, guauds che n’èn betg spess, e sper auals.

Era la Vipra dal Giura ha ina pupilla sco in stritg vertical ed è ina serp da tissi. Sco tar la Vipra cruschada èsi d’ir tant pli spert tar il medi. Per ordinari na datti dentant betg problems. Ina Vipra dal Giura morda era mo sch’ella na po betg fugir u sch’ins avess da passar sin ella. Per il pli ha ella gia sentì ils umans ditg avant che quels vesan la serp e scappan.

La colur da la Vipra dal Giura po esser fitg differenta. Ella po esser grischa, bescha, mellen-brin u cotschen-brin. Il muster nair sin il dies da la serp è magari da vesair fitg bain e magari insumma betg.

La serp mangia oravant tut mieurs. Magari utschels. Las pitschnas serps che na pon anc betg magliar entiras mieurs mangian luschards.

La Vipra dal Giura na metta nagins ovs. Las serps vegnan anc en il corp da lur mamma or da la crosa dals ovs e pir lura vegnan els sin il mund. Las serps ch’èn suenter la naschientscha 14 fin 24 centimeters grondas pon lura gist sezzas ir a la tschertga da predas.