Schumellins

Schumellins vesan ora medem e fan bleras chaussas tuttina. Ma lur caracter è different. Esser schumellins na vul betg dir esser medems.

Schumellins vesan ora medem e fan bleras chaussas tuttina. Ma lur caracter, quel è different. Esser schumellins na vul pia betg dir esser medems. Il Minisguard declera, danunder che las differenzas tranter ils schumellins derivan.

I va meglier en dus

Schumellins han schon bel. En dus pon els vilentar ils fragliuns, dar da crair en scola ch’els sajan tschel schumellin u trenar ensemen per in hobi.

Ch’i va magari meglier en dus mussan differents schumellins. Schumellins che han gì ensemen fitg gronds success, perquai ch’els eran en dus. Qua intgins exempels:

David e Philipp Degen

Legenda da maletgs: David e Philipp Degen Wikipedia

David e Philipp Degen

Ils dus giugaders da ballape svizzers, David e Philipp Degen èn schumellins. Pli baud han els pudì trenar ensemen per la carriera da ballape. Ils giuvens da 28 onns han dentant betg fatg la medema carriera e na giogan tar ils medems clubs da ballape. David gioga surtut per equipas Svizras, per il mument tar il club “BSC Young Boys” e Philipp gioga tar il club da la Germania “VFB Stuttgart”.

Mary-Kate ed Ashley Olsen

Legenda da maletgs: Mary-Kate ed Ashley Olsen Google

Mary-Kate ed Ashley Olsen

Cumenzà ha la carriera da Mary-Kate ed Ashley Olsen ils onns 90 en la seria americana “Full House”. Là avevan ellas anc gnanc in onn. Ellas partevan la rolla da Michelle, la figlia giuvna da la famiglia. Silsuenter han ellas fatg part a pliras serias ed en plirs films da kino. Ussa han ellas schizunt in’atgna marca da resti, bischutaria, cosmetica, parfum e cudeschs. Las schumellinas, ch’èn tranter ils pli ritgs acturs da Hollywood, vesan ins rar persulas.

  Bob e Mike Brian

Legenda da maletgs: Bob e Mike Brian Google

Bob e Mike Brian

En il sport poi esser propi d’avantatg sch’ins ha in schumellin. Saja quai per trenar u per giugar ensemen. Uschia ha quella strategia funcziunà fitg bain tar ils schumellins Bob e Mike Brian dals Stadis Unids da l’America. Els giogan ensemen tennis dubel. Ensemen èn els uschè buns ch’els èn ils megliers dal mund.

James ed Oliver Phelps

Legenda da maletgs: James ed Oliver Phelps Google

James ed Oliver Phelps

Ils dus schumellins dals Stadis Unids da l’America, James ed Oliver Phelps, èn acturs. Els èn surtut enconuschents pervia dals films da “Harry Potter”. Là giogan els ils schumellins Fred e George Wisley, ils frars da Ron, ch`è il meglier ami da Harry Potter.

Romulus e Remus

Legenda da maletgs: Romulus e Remus Google

Romulus e Remus

Romulus e Remus èn dus schumellins che han vivì l’onn 700 avant Christus, quai vul dir avant varga 2700 onns. Ils schumellins èn figuras d’ina ditga. I vegn raquintà che Romulus e Remus sajan vegnids educads d’in luf e pli tard hajan els fundà la citad, Roma. Perquai ch’els hajan betg savì sa decider tgi ch’è il regent ha Romulus mazzà Remus. Romulus era regent ed ha dà l’agen num a la citad, Roma.