Siglir tar il cuntegn
cuntegn

Lexicon C Colurs e l'effect sin l'uman

Pertge vesain nus colurs? Ed ina terapeuta declera sin tge moda e maniera la colur influenzescha ils umans.

Pertge vesain nus colurs? E pertge existan las colurs atgnamain mo en noss tscharvè? Il Minisguard declera.

Colurs datti dapertut nua ch'ins va e guarda. Las colurs han in effect sin l'uman ed influenzeschan era ferm l’agir dals umans: durant la lavur, tar far las cumpras ed era en scola. Qua datti ina survista d'intginas colurs e lur effect.

Daniela Berther, terapeuta da colurs
Legenda: Daniela Berther, terapeuta da colurs RTR

Las scolaras ed ils scolars primars da Salouf-Mon-Stierva na van betg gugent a scola. I n'è betg pervi da las scolastas e dals scolasts. Na, sco quai ch'i para èsi las colurs da la scola cha na plaschan betg. Quella è numnadamain grischa. I manca simplamain colur. È la colur che manca la culpa che las scolaras ed ils scolars da Salouf n'han betg gust dad ir a scola? E sin tge moda e maniera influenzescha la colur ils umans? La terapeuta da colurs declera.

 

 

Las colurs han pia in effect sin l'uman. Qua datti ina survista, d'intginas colurs e lur effect:

Cotschen: activitad, energia, passiun, agressivitad
Oransch: chaud, agreabel, positiv, fa appetit
Mellen: cuntent, energia
Verd: colur da la vita, speranza, sa quietar
Blau: ruassaivla colur, frestg, recreaziun
Violet: stimulescha spert ed olma
Brin: sa calmar
Nair: trist, tema
Grisch: lungurus, desolà
Alv: innocent, schuber, cler

Colurs datti dapertut nua ch'ins va e guarda. Era nossa redactura Angela Hitz ha fatg stim e fotografà tut quai che aveva colur ch'ella ha vis sin via a chasa.

Ina scola dovra colur

En il Grischun han las scolas per il solit colur grischa, plitost ina colur trista. Era la chasa da scola da Salouf-Mon-Stierva ha paraids, sulers e stanzas grischas. Uschè bler grisch ch'ils uffants na gievan betg gugent a scola. Mo tge far? Ils scolars han vulì dar colur a las paraids, mo quai na vulevan ils responsabels betg. Lura han ils uffants gì l'idea da far figuras d'animals en lain e dar colur. Els han prendì la chamischa da pictur ed il penel e procurà che la scola survegnia in pau colur.