Siglir tar il cuntegn
cuntegn

Lexicon C Circus

Ils circus van da lieu tar lieu e preschentan lur program. Per che tut funcziuna tenor program, datti bler da far: quai davant e davos las culissas.

Blera glieud va a circus perquai ch'i vesan là animals, auters n'han insumma betg plaschair ch'i dat animals en in circus. Il Minisguard declera ils avantatgs ed ils dischavantatgs per ils animals en in circus.

Il circus vegn

1 e mez vouta entuorn la Svizra
Legenda: 1 e mez vouta entuorn la Svizra RTR

Ils circus van da lieu tar lieu e preschentan lur program. Mo per far quai dovrani sper la tenda anc bler auter urden e quai sto era mintgamai vegnir transportà da lieu tar lieu. Tar il circus Knie – il pli grond circus da la Svizra vegn quai transportà cun il tren.

Il circus Knie visita durant in onn 42 citads ed è durant 243 dis sin turnea. Sch’ins dumbra ensemen ils viadis cun il tren da citad tar citad, lura dat quai in viadi da 2846 kilometers. Quai è uschè lunsch sco d’ir ina giada e mez suenter ils cunfins da la Svizra.

Per transportar l’urden, la glieud ed ils animals dovra il circus Knie 53 chars da transport da viafier. Quels furman dus trens spezials. In tren ha la lunghezza da 455 meters e paisa 770 tonnas. Il segund tren ha ina lunghezza da 349 meters e paisa 590 tonnas. Sin quels dus trens èn en tut 88 rulottas ed otg vehichels motorisads, sco per exempel tractors.

Ils dus trens da che transporteschan la rauba dal circus Knie
Legenda: Ils dus trens da che transporteschan la rauba dal circus Knie RTR
Ils chars da viafier vits.
Legenda: Ils chars da viafier vits. RTR

 

Ils chars vegnan chargiads gia la saira curt suenter la davosa preschentaziun dal circus en ina citad. Ed ils trens van anc la notg en il proxim lieu.

Cun tractors vegnan las rulottas ed autra rauba chargada sin ils chars da viafier.
Legenda: Cun tractors vegnan las rulottas ed autra rauba chargada sin ils chars da viafier. RTR

En l’emprim tren che parta èn ils collavuraturs ed il material per bajegiar si la tenda da circus. En il segund tren vegnan lura ils animals, sco per exempel ils elefants, chargiads. Uschia pon ils collavuraturs gia preparar il dachasa per ils animals avant che quels èn là. Uschia ch’ils animals san gist ir dal tren en lur da chasa e na ston betg spetgar enturn en ils vaguns da tren.

 

Las rulottas ston vegnir fermadas sin il chars da viafier.
Legenda: Las rulottas ston vegnir fermadas sin il chars da viafier. RTR

Ils collavuraturs san adina exact tge ch’i han da far. Perquai è tut gia pront in per uras suenter ch’il circus è arrivà en in nov lieu per las visitadras ed ils visitaders.

 

Ils vehichels dal circus Knie ch'èn sin via.
Legenda: Ils vehichels dal circus Knie ch'èn sin via. RTR

Mo era sin via vegn transportà urden. 60 vehichels cun char annex van sin via da lieu tar lieu. Cun quels vehichels vegnan prest tut ils animals transportads. Ina excepziun èn las schimgias. Quellas vegnan transportadas cun la viafier.

 

Uschia guarda quai ora cura ch'ils collavuraturs dal circus Knie bajegian si lur tenda.

La tenda bajegian 28 collavuraturs si aifer 5 fin 6 uras. En la tenda han passa 2000 persunas plaz. Sin l’entir plaz dal circus vegni tratg 10 fin 12 kilometers cabels d’electricitad. Sch’ins giess a pe sper quests cabels lura avess ins passa 2 uras per quest viadi.

Zirkus Knie è per la 100avla giada sin turnea

Circus — insatge che fascinescha. Là datti shows cun animals, clowns, artists ed anc bler dapli! Il Minisguard ha dentant vulì vesair co i guarda ora davos las culissas dal circus Knie.

Legenda: Guardar il video Per la 100avla giada è il Zirkus Knie sin turnea. Durada 03:59 minutas.
Or da Minisguard dals 21.04.2018.

Circus Robinson giastescha a Cuira

Circus Robinson
Legenda: Circus Robinson RTR, M. Demont

Mintga stad va il circus Robinson sin turnea e quest onn è el vegnì per in'emna a Cuira. Il Radio Rumantsch dat in sguard davos las culissas dal circus d'uffants.

Impressiuns d'ina producziun dal circus (Fotos: RTR, M. Demont), il link avra en ina nova fanestra

 

Uffants emprendan da far circus

6 emnas cuzzan las vacanzas da stad en Engiadina. Per porscher als uffants in program da passatemp, offerescha la vischnanca da Zuoz a 20 uffants indigens la pussaivladad d'emprender da far circus. Quai èn uffants tranter 8 e 12 onns da differents lieus tranter Schlargina e Zernez che pon prender part a la scola da circus per uffants.

Ina giaglina che va cun skateboard

Forsa avais vus era grond plaschair vi dals animals dal circus. Avais vus gia ina giada empruvà da dressar voss giat u voss chaun uschia ch’ins pudess mussar en il circus? Trais fragliuns da Breil han fatg quai. Els n’èn dentant betg sa preschentads al circus, mabain tar ina concurrenza a l’exposiziun da purs Agrischa a Glion. Quella è stada avant in’emna ed ils trais fragliuns han gudagnà l’emprim premi.