Siglir tar il cuntegn

Header

Purtret da Femi Kuti.
Legenda: Femi Kuti. Keystone
cuntegn

Hits e semperverds africans Hits africans – otgavl'emna

10.08. fin ils 16.08.2015

  • audio
    Tadlar Hits africans dals 10.08.2015
    ord RTR Audio dals 10.08.2015.
    laschar ir. Durada: 4 minutas 44 Secundas.

    10.08.2015 Femi Kuti – Oyimbo – Nigeria

    Femi Kuti, naschì l’onn 1962 a Londra, è il prim figl dal famus musicist nigerian Fela Kuti, il maister dal afrobeat. Creschì si è Femi a Lagos, la chapitala nigeriana, in lieu marcà da violenza, malperinadad e corrupziun. Cun 15 onns ha el cumenzà a sunar saxofon, curt sisur è el entrà en la gruppa da ses bab, substituind quel durant ses temp da praschun. E malgrà che Femi ha lura fundà il 1985 sia atgna, detg populara band «The Positive Force», malgrà ch’el ha sviluppà ses agens accents, pon ins dir ch’el maina vinavant la tradiziun da ses bab. Uschia cumbatta il figl er el en sias chanzuns las cundiziuns desastrusas da l’Africa, la paupradad, las malsognas, la colonialisaziun. Sco ses bab chanta el per englais patua, per cuntanscher uschè blera glieud sco pussaivel. Be ils vizis famus da Fela Kuti emprova Femi dad evitar – il consum e la glorificaziun da drogas, il sexissem virulent. Dal reminent – dacurt ha Femi concertà – per l’emprima giada insumma – ensemen cun ses frar pli giuven Seun Kuti.

  • audio
    Hits e semperverds africans dals 11.08.2015
    ord RTR Audio dals 11.08.2015.
    laschar ir. Durada: 4 minutas 57 Secundas.

    11.08.2015 Nneka - Viva Africa - Nigeria

    Nneka Egbuna è ses num cumplet. Naschida ils 24 da december 1980 a Warri, ina citad nigeriana, e creschida là, sco figlia d’in bab nigerian ed ina mamma tudestga. Cun 18 lura la emigraziun en Germania, nua che la giuvna abitescha l'emprim en ina WG a Hamburg-Altona. Ils coabitants rappegian, Nneka secundescha cun chant. Ed ella sviluppa ses agen stil, collocà insanua tranter hiphop, soul e reggae. Preprograms da Sean Paul e Seeed portan arbajas temprivas, avunda laud survegnan er ses emprims albums. Las chanzuns rapportan – per la gronda part per englais - da las cundiziuns desastrusas en la veglia patria, corrupziun, colonisaziun moderna, euv. L'onn 2009 ina emprima turnea en las USA, in onn pli tard contribuescha Nneka cun «viva Africa» ina chanzun al campiunadi da ballape en il Sidafrica. Dus onns pli tard suonda ina turnea africana! E la paletta musicala da la nigeriana tudestga daventa adina pli varianta e cumplexa ...

  • audio
    Hits e semperverds africans dals 12.08.2015
    ord RTR Audio dals 12.08.2015.
    laschar ir. Durada: 4 minutas 2 Secundas.

    12.08.2015 Amar Sundy - Camel Shuffle - Algeria

    L'ultim temp han gruppas da rock dals Tuareg fatg furore cun lur blues desertic, sco ils Tinariwen ubain ils Tamikrest. Ma in vegl bluesunz tuareghin è il Amar Sundy, naschì insacura en ils onns 60, en il desert algerin. En in emprim viadi è el finì ils onns 80 a Paris, nua ch'el ha fatg ditg musica da strada e da metropolitana. Giond lura pli tard en ils USA, ha Sundy gì divers entaups cun ils gronds bluesunz da là vi, Albert Collins, B.B.King, James Cotton u Albert King, cun il qual el ha schizunt fatg duas turneas. Turnà en Frantscha ha Amar Sundy lura sviluppà ses fitg agen blues, cumbinond quel american cun musica tradiziunala franzosa e cun tuns da la Sahara, creond quai che la revista Blues Sur Seine ha ina giada numnà «in dals pli bels success da la implantaziun musicala ed ina nova senda per il blues».

  • audio
    Hits africans dals 13.08.2015
    ord RTR Audio dals 13.08.2015.
    laschar ir. Durada: 3 minutas 46 Secundas.

    13.08.2015 Songhoy Blues – Irganda – Mali

    Il quartet Songhoy blues vegn dal Mali, in pajais cun bleras pievels ed etnias, e la convivenza n’è betg adina simpla. Ils Songhoy, 7% da la populaziun, vegnan dal nord, da la regiun da Timbuktu e Gao, ed els vivan in pau a l’ur, pertge il pajais vegn dominà dals Bambara che vivan èn il dis. Il pli grond problem en la patria dals Songhoy èn però ils Islamists, che han scumandà da far musica,per ils musicists Nathanel Dembelé e per Aliou, Garba ed Oumar Touré in scumond che tutga lur existenza. Lur reacziun: els fan enavant musica e cumbattan uschia cunter ils Islamists ed els vulessan er unir ils differents pievels cun lur musica. Songhoy blues cun «irganda», ritmus africans cun ghitarras electricas e bler schlantsch ed energia.

  • audio
    Hits africans dals 14.08.2015
    ord RTR Audio dals 14.08.2015.
    laschar ir. Durada: 5 minutas 42 Secundas.

    14.08.2015 Serge Beynaud – Talehi – Cote d’Ivoire

    La chanzun che nus preschentain oz en nossa seria da musica africana n’è betg in semperverd, per quai è el bler memia frestg. Enfin uss avain nus udi gronds semperverds da l’Africa, tocs impurtants dal jazz e hits dals ultims onns ch’èn rivads fin tar nus en ils radios, sco «7 seconds», «alene» ubain «Ye ke ye ke». I dat però er ina scena actuala e moderna che segua ils fastizs da la musica da l’Europa e dals Stadis Unids da l’America, il pop, il hip hop ed r’n’b. In da quels exempels actuals e «talehi» dal chantadur, arranschader e cumponist Serge Beynaud, naschi il 1987 à Daloa, a la costa d’ivur en l’Africa dal vest. Sia carriera ha cumenza il 2009, e gia suenter paucs onns ha el gì ina lingia da hits dal pop african da la generaziun nova e moderna. Ina generaziun musicala che vegn subsummada sut il nov stil numnà «coupé-décalé», dal qual Beynaud è in dals protagonists principals.

  • audio
    Hits e semperverds sidafricans dals 15.08.2015
    ord RTR Audio dals 15.08.2015.
    laschar ir. Durada: 4 minutas 20 Secundas.

    15.08.2015 Melissa Nkonda – Africa - Camerun/Frantscha

    Naschida ils 6 da november 1990 en Frantscha sco figlia da mamma algerina e bab camerunais è Mélissa Nkonda daventada enconuschenta sco participanta a la show da casting franzosa Nouvelle Star, l’onn 2009. Sgulada or vers il finale, ha la chantanta crititgà vehement l’emissiun, ch’ella “servia mo a smardegliar ils artists davant il public”. Perencunter ha ella gudagnà ina concurrenza dal label AZ, publitgond lura bainspert ses emprim album “Nouveaux Horizons”, che cuntegna in duet cun il rappunz franzos Soprano, plus la chanzun “Africa” – preschentada qua sco semperverd.

  • audio
    Tadlar Hits africans dals 16.08.2015
    ord RTR Audio dals 17.08.2015.
    laschar ir. Durada: 5 minutas 24 Secundas.

    16.08.2015 Velile Mchunu – Sondela – Africa dal Sid

    Velile Mchunu, enconuschenta er mo sut il num Velile, ha fatg carriera surtut cun la chanzun «Helele» (in remake da la chanzun A.I.E. Mwana dal 1975), registrada a chaschun dal campiunadi mundial da ballape 2010, en collavuraziun cun il Safri Duo danais. Naschida è Velile l’onn 1973 a KwaMashu en il natal da ‘Africa dal Sid, creschida si en ina Township sper Durban e frequentà la scola da teater a Johannesburg. Dapi intgins onns gioga ella a Hamburg la schamana Rafiki en il musical il Retg dals Liuns. 2010 ha Velile publitgà ses emprim album «Tales From Africa», che cuntegna tranter auter er la chanzun preschentada qua.

Artitgels legids il pli savens