Siglir tar il cuntegn

Header

cuntegn

Robert Demonti: «Jau sun dapertut dalunga da chasa»

Tadlar
Download

Il Sentiner viva actualmain a Stampa en Bregaglia. Dentant è il scrinari e musicist savens en viadi.

Durant sia vita professiunala ha l'um da 64 onns adina puspè tratg in stritg radical e cumenzà da nov en in auter lieu, in nov job. Uschia ha el vendì sia atgna scrinaria a Sent dad in di a l'auter ed ha cumenzà ina nova sfida sco viagiatur e vendider.

Ils ultims onns han ils midaments radicals er gì da far cun l'amur. Robert Demonti è suandà a ses cor. Tranter auter fin en il chantun Tessin. «Jau na sun betg bun da star sulet, jau dovr insatgi per il cor», di Demonti. El tgira perquai adina bain ils contacts cun ses enconuschents surtut dal sex feminin. Avant dus onns è el ì en pensiun anticipadamain. Dapi lura giauda Robert Demonti da pudair far spassegiadas en il guaud, far excursiuns u er be ir svelt sur il cunfin talian per ir a baiver in «dretg» café.

Musica en tgina

Sco fil cotschen han la musica ed il chantun adina accumpagnà il bab da dus uffants creschids. Il dun haja el ertà da sia mamma. Uschia è el bun da sunar gist in'entira paletta d'instruments e daccumpagnar la melodia cun chant. La gronda part ha el emprendì sco autodidact.

Enconuschenta è sia vusch er tar la musica da l'Alpina Quintett che ha gì durant onns grond success en la scena da musica populara. Ils texts da las passa 120 chanzuns ha per part scrit er Robert Demonti.