En il center da l'emissiun stattan dus cudeschs, nua che protagonists fan in viadi creativ. Preschentà vegn il roman «Der letzte Satz» da Robert Seethaler e «Eine Fussreise durch Graubünden im Zeitalter der Postkutsche», in diari d'in viadi da l'onn 1857. Ils giasts dal magliacudeschs èn questa giada Iso Camartin e Cristian Collenberg.
L'autur austriac Robert Seethaler descriva il return dal dirigent e cumponist Gustav Mahler da New York en Europa. Mahler è malsaun ed ha mo anc paucs mais da viver. Sin la punt dal bastiment sa regorda el da sia vita.
«Eine Fussreise durch Graubünden im Zeitalter der Postkutsche» è il diari dal Bernais Samuel Kistler ch'è chaminà cun in cumpogn tras il Grischun. Sin quella spassegiada han ils dus chattà bels motivs per malegiar, ma er lieus sgarschaivels.
Il tip da la magliacudeschs Romana Ganzoni è «Capricorns e cocaïn», in roman da scola da la 1.–3. reala da Zernez. La coach da scriver dals giuvens auturs ed auturas quinta d'ina istorgia incredibla.
