Che San Murezzan è daventà il lieu preferì da la high society ha bler da far cun la figura legendara da Johannes Badrutt (1819-1889), oriund da Pagig en il Scanvetg, che ha fatg ord la simpla «Pension Faller» il nobel «Hotel Engadiner Kulm».
Ussa, 200 onns suenter sia naschientscha, sa metta la Marella sin ils fastizs dal «Patriarca di San Maurizio», sco el vegniva numnà dal poet talian Bernardino Zendrini. En ils archivs dals hotels «Kulm» e «Badrutts Palace» a San Murezzan avain nus chattà brevs, skizzas e documents da sia vita, da ses projects e davart las legendas enturn la persuna, Johannes Badrutt.
Repetiziun dal matg 2019. Durant la stad preschenta la Marella er quest onn inqual perla radiofonica ord noss archiv.
