El è senza dubi ina da las persunalitads impurtantas da la musica populara svizra e grischuna: Josias Jenny, il cumponist e musicant ch'è naschì ils 29 d'avrigl 1920 ad Arosa e mort ils 7 da november 1989 a Köniz. El ha sunà cun blers musicants enconuschents e tar bleras chapellas da renum sco il «Berner Ländlerquartett» ed a partir dal 1955 fin il 1980 tar la chapella legendara «Zoge-n-am-Boge».
Jenny ha impressiunà a blers auters musicants ed er per la generaziun giuvna è el in idol. El ha er cumponì blers sauts enconuschents cun rassa e schlantsch e divers da quels tadlain nus oz: «En urchige Bündnerwalzer», «Dia alt Schanfiggerpost», «Dr Pfyffestopfer», ubain il «Aroser Schottisch».