La chanzun «All Summer Long» da Kid Rock è stada il 2008 in hit mundial e sin las emprimas plazzas dad otg pajais – er en Svizra. Duas parts impurtantas da quest toc ha el però emprestà d'auters interprets. Kid Rock è sa servì tar Lynyrd Skynyrd e lur «Sweet Home Alabama» e principalmaintg tar Warren Zevon, in cumponist e musicist american che ha vivì dal 1947 fin il 2003.
Da sia chanzun «Werwolves of London» vegn l'emprim riff da ghitarra, in ch'ins enconuscha be subit. Questa chanzun era atgnamain ina sgnocca betg seriusa, naschida durant las lavurs da registraziun per in disc da Zevon dal 1978. L'idea era vegnida da Phil Everly dals Everly Brothers che aveva vis en la televisiun in film dal 1935 davart ils «Werewolves of London» ed els avevan zambregià in toc divertent ch'è lura er rivà sin il proxim disc da Zevon.
Da la partida tar quel toc era ina band da studio cun commembers prominents: sper Warren Zevon anc Mick Fleetwood, John McVie e Waddy Wachtel a la ghitarra. El ha gì l'incumbensa la pli difficila. Ses intro è pero daventà in dals pli renumads da la musica da rock.
