Siglir tar il cuntegn

Header

audio
Keystone
laschar ir. Durada: 2 minutas 43 Secundas.
cuntegn

Tge far cunter vesprers?

Vespras pon esser mulestusas. Cura ch'ins vul mangiar ordavert, vulan ellas er sa servir vid nossas mangiativas. Dentant betg tuttas, i dat er las «bunas» vespras. Tuttina pon er quels vesprers disturbar.

In vesprer sin balcun ni en curtin po esser mulestus. Cunzunt sch'el è il dachasa da las vespras da chau curt. Ellas èn quellas che vulan vegnir tar nus sin il taglier e mangiar davent a nus nossa charn, quai ha declerà l'expert da vespras Thomas Hensch vers SRF. Lura datti er anc las vespras da chau lung u las vespras grondas (Hornisse), quellas construeschan ils vesprers che pendan e ch'ins vesa uschia bain. Sch'il vesprer e las vespras na disturban betg, pon ins pia senz'auter laschar el. Gist las vespras da chau curt èn numnadamain er fitg nizzaivlas, ellas van a la chatscha dad auters insects mulestus sco mustgins e mustgas.

Betg sez dustar il vesprer!

Sch'il vesprer disturba dentant perquai ch'el è gist sin balcun u en la stora, lu duess ins dustar el. U meglier, laschar dustar el. Perquai che las vespras han pauc plaschair sch'ins prenda davent ad ellas lur dachasa. En in vesprer pon tschients u schizunt millis vespras sa chattar, ed ellas daventan agressivas sch'ins disturba ellas, uschia Thomas Hensch. Perquai duess'ins laschar vegnir il spezialist. Quai pon esser ils pumpiers u ina firma spezialisada.

Pretschs fitg differents

En scadin cas fai dentant senn da cumparegliar ils pretschs. Ils collegas dad SRF Espresso han numnadamain chattà pretschs da tranter bun 100 francs e 450 francs. Sch'ins stat a tschains lura sto il locatur organisar e pajar l'acziun. E sch'ins è possessur da chasa, lura renda quai da dar in sguard en la segirada da mobigliar, tut tenor surpiglia quella numnadamain ils custs.

Dapli da «Co e cum»

Scrollar a sanestra Scrollar a dretga