Siglir tar il cuntegn

Header

audio
RTR
laschar ir. Durada: 3 minutas 30 Secundas.
cuntegn

Bigliets automatics da la SBB

Las Viafiers federalas han introducì in nov bigliet digital – l'Easy Ride. Cun quel pon ins simplamain ir en il tren, activar l'app e puspè deactivar l'app, cura ch'ins è a l'arrivada – lura vegn quintà giu quai ch'ins è er ì.

Co funcziuna Easy Ride?

La app na funcziuna betg automaticamain. Ins sto activar il ticket en la app curt avant ch'il tren parta. Cura ch'ins è arrivà pon ins simplamain puspè deactivar il ticket – tut simpel cun in nuf cotschen en la app. E silsuenter vegn gist mussà quant char ch'il viadi è stà.

Tgè dovran ins per pudair duvrar quai bigliet automatic?

Ins dovra in Swiss-Pass cun il qual ins po s'annunziar sin la app. Lura dovran ins ina carta da credit u in'autra pussaivladad per pajar online. E lura dovran ins anc in telefonin cun ina carta SIM, nua ch'ins po tschentar en las datas mobilas. In problem datti, sch'ins ha mo in telefonin da pre-paid.

Co sa la app nua che mes viadi parta e finescha?

Quai è il punct dispitaivel. Ins sto tschentar en il GPS sin il telefonin, l'uschenumnà Ortungsdienste, per che l'app sa nua ch'ins va atras per savair tge ruta ch'ins fa e lura pudair quintar ora il pretsch dal bigliet. Pia sch'ins vul duvrar «Easy Ride», lura na pon ins betg pli viagiar anonim. La SBB sa tgi che va cura, nua e cun tge med da traffic.

E tge schabegia sche mes telefonin n'ha nagin accu pli?

Mintgin che dovra Easy Ride è sez responsabel ch'il telefonin funcziunescha ed ha accu. Uschiglio na vala il bigliet betg ed ins sto pajar il bigliet e tut tenor tren u bus er in chasti.

Tge ch'ins sto era savair è, che sch'ins mida tren u bus u bastiment lura na ston ins betg deactivar ed activar il bigliet. Grazia a las datas da GPS sa l'app ch'ins ha midà tren.

Dapli da «Co e cum»

Scrollar a sanestra Scrollar a dretga