Noss chors dovran sper la chanzun originala rumantscha era chanzuns translatadas. Senza na basta quai betg! E quai è bun uschia! Sa chapescha che la translaziun enserra ristgs. I dat bunas e malas translaziuns. Igl è impurtant che dirigentas e dirigents sa fatschentan cun il text da la chanzun, saja quel en sia versiun originala u en ina versiun translatada.
L'Artg musical porta intgins exempels interpretads da chors virils: Ligia Grischa, Lumnezia, Surses e Trun e dals maschadads: Rudè da chant Engiadina, Cor baselgia Müstair, Cor da la scoula EMS Samedan e dal cantus firmus surselva. Las musicas da Trun, Sagogn, Domat, Zernez, Mustér e la Brass Band Sursilvana interpreteschan ovras scrittas dals indigens: Corsin Tuor, Gion Balzer e Gion Andrea Casanova, Roman e Gian Stecher, Janet Lehner e Giusep Sialm.
