Quel resuna a Silvester, tar eveniments da sport ed anc bleras autras occasiuns. «Europe» era ina band tipica dals onns 80 e 90, cun vestgadira e frisuras ch'èn scumandadas ozendi. Cumponist è Rolf Magnus Joakim Larsson, alias Joey Tempest, il chantadur. Ils emprims tuns da la chanzun notescha el gia al cumenzament dals onns 80, cura ch'el va anc a scola. Las sairas e notgs experimentescha el cun ses keyboard ed ina da sias ideas serva pli tard, il 1986, sco basa per il grond hit da sia band. Els vulevan che quel avess er schanzas da vegnir en ils radio americans, e perquai han els engaschà Kevin Elson sco producent, e quel ha tramess la band en Svizra en ils «Powerplay Studios» a Maur, quella giada in dals studios cun grond renum. El aveva er l'avantag dad esser en in lieu calm, senza grondas pussaivladads per sa divertir, ed uschia era la lavur en il studio en il center. «The Final Countdown» daventa in megahit e la band «Europe» venda milliuns albums. Enfin oz è quai in dals semperverds eterns dals onns 80, in che na svanescha betg uschè spert.
Nostradamus?
La chanzun ha però er anc in'autra vart. I dat teorias che mettan quella en in connex cun las predicziuns da Nostradamus. La chanzun è vegnida registrada il 1986, Nostradamus è mort il 1566 e sch'ins addescha las duas cifras dà quai 3552. Cun subtrahar la cifra 1535, l'onn da las visiuns da Nostradamus, dà quai il resultat 2017, l'onn dal «The Final Countdown» da l'apocalipsa. Ina bella teoria, però uss, in onn pli tard, èsi cler che la chanzun da «Europe» è sulettamain in grond semperverd.
