Tschuncaisma

Tschuncanta dis suenter Pasca festivain nus puspè in firà religius ed essan cuntents da betg stuair lavurar il glindesdi. Pertge è quest num dal tuttafatg auter en rumantsch ed en rumen ch'en tut las linguas romanas? Il Grischun e la Rumania eran situads a la periferia da l'imperi roman, cura ch'il cristianissem ha cumenzà a sa derasar. La lingua da communicaziun religiusa da quel temp era il grec. En grec è il pled per la festa 50 dis suenter Pasca «Pentekostes» e las linguas da noss vischins han adoptà quell'expressiun. Las linguas a l'ur da l'intschess latin han dentant conservà soluziuns separadas, era noss pled per la baselgia mussa quai fitg bain.