Nino Rota: «The Godfather Waltz»

Il 1972 cumpara in'ovra monumentala dal reschissur american Francis Ford Coppola, in dals films ils pli impurtants da l'istorgia. «The Godfather» ubain «Der Pate», cun acturs sco Marlon Brando, Al Pacino e Diane Keaton, è l'emprima part d'ina trilogia davart la famiglia Corleone e la Mafia a New York. Coppola era impressiunà da la musica dal cumponist talian Nino Rota, che aveva er fatg musica da film per reschissurs da renum sco Luchino Visconti e Federico Fellini. Rota ha surprendì l'incumbensa e sia musica accumpogna sco in fil cotschen tuttas trais parts dal film. In dals tocs ils pli enconuschents è il valser dal patrun, il «Godfather Waltz» che sa basa sin la musica tradiziunala da la Sicilia. El ha savì stgaffir in'atmosfera privada e familiara, cun tuns da accordeon, mandolina e trumbetta, sco tar ina festa a Corleone. Il film cuntegn pero er scenas dramaticas – ed er qua ha Nino Rota chattà ils tuns adequats. Per sia musica da la segunda part ha el lura er survegnì in Oscar.