Ils dus Antonis han laschà lur passidas en tut il Grischun. Tantas schlattas mussan quant populars ch'ils dus sontgs eran en noss chantun. Ils Cantienis, ils Tuenas ed ils Tönz mussan che tut las trais linguas chantunalas fan endament quels sontgs anc oz. Era toponims sco la «Pleunca dil Toni» a Breil enfin il «Fasten da Töna» ad Ardez mussan la derasaziun.
Sche nus ans deditgain al vitg St. Antönien en Partenz, lura perquai ch'avant dus dis è vegnida inaugurada al Museum retic a Cuira l'exposiziun sur dals vaschlers da la famiglia Lötscher. Questa famiglia da St. Antönien ha producì durant il 19. tschientaner ina cheramica fitg originala cun decoraziuns giaglias.
