Severija Janusauskaite: «Zu Asche, zu Staub»

Actualmain va la seria da televisiun «Babylon Berlin» sin plirs emetturs – e fascinescha il public. La producziun pretensiusa raquinta ina istorgia criminala da la fin dals onns 1920 a Berlin, e sper il film procura er ina chanzun per grond interess. «Zu Asche, zu Staub» è la melodia principala, in toc misterius, avantgardistic ed ipnotisant. Quel datti gia dapi l'onn passà, pero pir uss, suenter ch'il film va er tar la ARD, l'ORF e la SSR en Svizra, èn vegnids l'interess ed il success. Tar ils servezzan da telechargiar sco iTunes è il toc in dals pli actuals ed audituras ed auditurs èn fascinads. En il local «Moka Efti» sa divertischa in grond public e giauda notgs senza quitads. Sin il palc chanta Psycho Nikoros, en il stil da Marlene Dietrich cun frac e cilinder: «Zu Asche, zu Staub, dem Licht geraubt, doch noch nicht jetzt, Wunder warten bis zuletzt» - fin che l'atmosfera daventa extatica e dramatica. Il public sauta e para da sa perder – e na sa betg anc ch'ils temps vegnan a sa midar bainspert.