Siglir tar il cuntegn
cuntegn

WEF Trump na vegn tuttina betg

Il president dals Stadis Donald Trump ha definitivamain ditg giu sia participaziun al Forum mundial d’economia a Tavau pervi dal «shutdown». Quai ha el communitgà via Twitter.

La raschun ch'el na vegnia betg a Tavau quest onn saja la dispita enturn il budget american. La culpa sajan ils democrats che na dettian betg suenter. Quai ha Donald Trump communitgà via Twitter.

Parts da la regenza bloccadas dapi 20 dis

Pervia da la dispita enturn ina nova lescha da budget è quel bloccà dapi ils 22 da december 2018. Pertutgads dal «shutdown» èn radund 800’000 emploiads federals. Sch’il congress ed il president na chattan nagina cunvegna fin sonda fiss quai la pli lunga bloccada en l'istorgia americana.

Mir dispitaivel al cunfin cun il Mexico

Donald Trump insista vinavant ch’il nov budget cumpiglià ils meds finanzials per construir in mir al cunfin cun il Mexico. Per quest intent pretenda il president 5,6 milliardas dollars. Ils democrats ch’han da nov la maioritad en la chombra dals represchentants refuseschan quai dentant categoricamain.

Reacziuns sin l'absenza da Trump

Malgrà che Trump na vegn betg a sa participar al WEF 2019 èn ils organisaturs cuntents ch'ina gronda delegaziun dals Stadis Unids vegn tuttina ad esser preschenta. Quai mussia l'interess ch'ils Americans hajan da collavurar cun lur partenaris internaziunals. Per la polizia dal chantun Grischun n'haja l'absenza da Trump betg in'influenza sin il dispositiv da segirezza. Era tar las demonstraziuns na dettia betg midadas. La Juso demonstreschia en emprima lingia cunter il forum sco tal e betg cunter persunas singulas. Er per la Partida socialdemocratica n'haja l'absenza da Trump nagina influenza.

RR novitads 18:00++