Siglir tar il cuntegn
cuntegn

WEF Segirezza al WEF dastga custar dapli

Per la segirezza al Forum mundial economic stat da nov in milliun francs dapli a disposiziun.

In tetg cun blera naiv ed il logo da Tavau. Davostiers in um da segirezza armà ed in auter cun perspectiv.
Legenda: Ils custs per la segirtad pon custar dapli. Keystone

Il plafonament dals custs per la segirtad durant il Forum mundial economic a Tavau è vegnì schlargià dad 8 milliuns sin 9 milliuns francs, quai ha confermà il cusseglier guvernativ Jon Domenic Parolini sin dumonda da la gasetta Südostschweiz. Uschia saja questa emna ina cunvegna correspundenta vegnida suttascritta, ha ditg Parolini.

Fin uss vegniva la segirtad garantida cun ina summa dad 8 milliuns francs. La Confederaziun pajava trais milliuns, dus milliuns pajavan mintgamai il chantun ed il WEF e l’ulteriur milliun la vischnanca da Tavau. Questa clav da repartiziun resta era per la nova summa da 9 milliuns francs.

Custs da segirtad èn creschids mintg'onn

L'augment dal plafonament dals custs è stà necessari, perquai ch'ils custs da segirtad èn creschids marcantamain ils ultims onns. Gia ils davos trais onns na sajabetg pli stà pussaivel da garantir la segirezza cun ils 8 milliuns francs previs, rapporta la Südostschweiz.

Ils custs da segirezza eran vegnids surpassads il 2015 cun 198'000 francs. Gia il 2016 avevan ils cust totals però muntà a sur 9 milliuns francs e l'onn passà a 9,53 milliuns francs. Dapi il 2013 è quai in augment da var 2 milliuns francs.

RR novitads 06:00