Siglir tar il cuntegn
Inhalt

WEF Segirezza al WEF 2018: Bilantscha positiva

La regenza grischuna fa bilantscha positiva da la situaziun da segirezza al Forum mundial d'economia da quest onn.

Placat.
Legenda: Il WEF 2018 è istorgia. Keystone

Cusseglier guvernativ Christian Rathgeb è cuntent sco il WEF è passà. Bain haja quai dà in caos da traffic pervi da la naiv ed ina pitschna demonstraziun saja vegnida fatga nunlubidamain, dentant tut en tut saja la bilantscha positiva.

Er quai che pertutga la visita dal president dals Stadis Unids Donald Trump n'haja dà nagins incaps. La collavuraziun cun il «Secret Service» dals Stadis Unids haja funcziunà senza problems. Quai ha communitgà la regenza grischuna.

Situaziun da traffic

Uss giaja d’evaluar il Forum mundial d’economia a Tavau. Tranter auter vegnia il concept da traffic reponderà. Quants policists, ch'èn stads en acziun per garantir la segirezza al WEF, na po Christian Rathgeb betg dir. Pervi da la visita da Donald Trump na sajan quai però betg stads dapli che usità.

Dimensiuns dal forum

Tenor il landamma da Tavau, Tarzisius Caviezel, haja il WEF cuntanschì ses cunfins. Quai ha el ditg venderdi saira davant schurnalists ed agiuntà che la grondezza dal forum haja cuntanschì in punct plitost critic.

Tendenzialmain sto il forum daventar pli pitschen.
Autur: Tarzisius Caviezellandamma da Tavau

La raschun per quest parairi sajan cunzunt ils profitunzs. Manegiadas èn organisaziuns e firmas che n'han atgnamain da far nagut cun il WEF, ch'affitan dentant bleras butias a Tavau.

RR novitads 18:00+