Il svilup da la pandemia saja la raschun per spustar danovamain l'inscunter a Tavau, uschia in pledader dal WEF envers l'agentura da novitads tudestga, DPA. Il forum mundial d'economia fiss stà planisà dals 17 fin ils 21 da schaner.
Manà a la decisiun da spustar l'inscunter, haja la derasaziun da la varianta omicron dal virus. Plinavant fissi pervi da las restricziuns da viagiar sco er pervi da las mesiras per cumbatter il coronavirus, stà fitg cumplitgà d'organisar l'inscunter. Quai ha la fundaziun cun sedia a Genevra communitgà.
Eventualmain in inscunter la stad
Ins veglia laschar s'inscuntrar las persunas a la testa da sadis ed interpresas a moda virtuala, uschia il fundatur dal WEF, Klaus Schwab. Per in proxim inscunter real piglia la fundaziun en mira il cumenzament da la stad 2022.
Gia il forum economic mundial da quest onn aveva gì lieu a moda virtuala. Quai suenter che l'ediziun planisada l'avust a Singapur era medemamain vegnida annullada.
