Siglir tar il cuntegn

Header

cuntegn

Votaziuns Decisiuns en vischnancas grischunas

Ina survista da votaziuns ed elecziuns en las vischnancas dal Grischun.

  • Vopna da Domat
    Legenda: Domat RTR

    Domat

    Domat di NA ad in nov sutpassadi «Gassa surò» datiers da la staziun. Cun 1'400 cunter 976 vuschs refusan votantas e votants il credit da 7,5 milliuns francs. La suprastanza communala vuleva manar il traffic sut ils binaris ora e schliar las barrieras da la viafier. Approvà han ils da Domat persuenter il preventiv ed il pe da taglia per l'onn 2019 ed ina contribuziun per sanar la baselgia Sogn Gion.

  • Vopna da Cuira
    Legenda: Cuira RTR

    Cuira

    Cun 81% din votantas e votants cleramain GEA al credit da 44 milliuns francs per il project «Eisball» – che vul concentrar las purschidas da ballape e hockey sin l’areal «Obere Au». Plinavant din 85% dals da Cuira GEA a l'integraziun da la vischnanca da Maladers en la citad. Votantas e votants da Maladers han gia approvà l’incorporaziun a lur radunanza communala.

  • Vopna da Tavau
    Legenda: Tavau RTR

    Tavau

    Il suveran da Tavau di GEA al credit da bun 20 milliuns francs per modernisar la plazza «Arkaden» sin la promenada (cun 61% da las vuschs). Igl è previs ina nova plazza publica, da modernisar il kino, sanar il center da sport, remplazzar la halla existenta cun ina halla traidubla, schlargiar la via da scola e stgaffir parcadis aifer il bajetg da la Banca chantunala grischuna. L’entir project vul Tavau realisar en 6 etappas.

  • Vopna da San Murezzan
    Legenda: San Murezzan RTR

    San Murezzan

    En il segund scrutini ha la vischnanca elegì 13 persunas per il parlament communal. En l'emprim scrutini avevan be trais represchentants cuntanschì la maioritad absoluta. Il president communal (Christian Jott Jenny) e la suprastanza communala han ils da San Murezzan gia elegì quest atun.

  • Vopna da Claustra
    Legenda: Claustra RTR

    Claustra

    Votantas e votants din GEA a la revisiun per la planisaziun locala (cun 986 cunter 872 vuschs). Quella è necessaria per che las pendicularas Claustra-Madrisa possian realisar in ressort da famiglia «Ober Ganda» a Claustra-Vitg. En il ressort è planisà in hotel cun 156 letgs, 78 abitaziuns da vacanzas, in’ustaria e parcadis. Cleramain GEA din ils da Claustra a l'aboliziun da la «Lex Koller» communala sco era al preventiv ed al pe da taglia per l'onn 2019.

  • Vopna da Panaduz
    Legenda: Panaduz RTR

    Panaduz

    Cun 896 cunter 186 vuschs di il suveran cleramain GEA al credit da 18 milliuns francs per bajegiar ina nova halla polivalenta. Previs è ina halla da gimnastica dubla ed ulteriuras localitads per scola e scolina. La nova halla sin l’areal da scola «Ruver» duai esser finida la fin dal 2020.

  • Vopna da Glion
    Legenda: Glion RTR

    Glion

    La vischnanca da Glion di GEA al credit da bun 7,6 milliuns francs per renovar l’areal dals autos da posta sin la staziun. Il resultat è cler cun 1'053 cunter 451 vuschs. Suenter che la Viafier retica ha renovà la staziun ed ils binaris, vul la vischnanca realisar a partir da l’onn proxim in areal per ils autos da posta, plazs da parcar ed ina nova zona da peduns sin la staziun.

  • Vopna da Flem
    Legenda: Flem RTR

    Flem

    Tranter Flem e Laax datti ina nova via per peduns e velocipedists. La vischnanca da Flem ha concedì il credit total dad 1,25 milliuns francs cun 690 cunter 287 vuschs. La finala sto Flem surpigliar 570’000 francs. La nova via per peduns e velocipedists maina davent da la Via Prau la Selva enfin tar il parcadi Staderas.

  • Vopna da Val
    Legenda: Val RTR

    Val

    La vischnanca da Val ha acceptà la proposta co sanar las pendicularas: Ina nova taxa d’alloschament è vegnida acceptada cun 299 cunter 130 vuschs e la revisiun da la lescha da taglia cun 293 cunter 138 vuschs - là vai per auzar la taglia sin immobiglias. Questas entradas plus ina contribuziun da la vischnanca furman la summa da 900’000 francs che la vischnanca vul pajar mintg’onn a las pendicularas. Persuenter pon ils giasts ir gratuitamain cun la cabina si Gadastatt.

  • Vopna da Zernez
    Legenda: Zernez RTR

    Zernez

    In dals dus posts vacants en suprastanza communala èn ils da Zernez vegnì d'occupar: Riet Denoth è vegnì elegì cun 182 vuschs. L'ulteriur suprastant communal vegn eruì enten pigliar si contact cun las persunas che han survegnì vuschs - surtut enten resguardar sco prim la fracziun da Brail.

  • Vopna da Samignun
    Legenda: Samignun RTR

    Samignun

    Karl Jenal cumplettescha la suprastanza communala da Samignun. El è vegnì elegì en il segund scrutini cun 101 vuschs. Sco president communal è gia confermà Walter Zegg.

  • Vopna da Mustér
    Legenda: Mustér RTR

    Mustér

    La suprastanza communala è cumpletta: Wendelin Jacomet è vegnì elegì cun 437 vuschs (pli absolut 263). El era il sulet candidat e remplazza Iso Mazzetta che sa retira la fin da l’onn.

  • Vopna dad Alvra
    Legenda: Alvra RTR

    Alvra

    La vischnanca d'Alvra ha elegì sia suprastanza communala: Patrizia Zanini (201 vuschs), Ivan Sonder (198), Rico Liesch (188), Flavia Balzer (178), Reto Crameri jun. (172) ed Agnes Simeon (171) fan part a quella. Sco president communal era Daniel Albertin gia vegnì reelegì la fin d'october per in'ulteriura perioda d'uffizi.

  • Vopna dad Arosa
    Legenda: Arosa RTR

    Arosa

    La vischnanca dad Arosa di GEA a la participaziun da 6 milliuns francs vid ina nova organisaziun tetgala per il provediment da sanadad. Quella duai unir il center da seniors, la spitex, il center medicinal ed il servetsch da salvament sut in tetg e cunquai spargnar custs. La vischnanca vul surlaschar a la nova organisaziun differentas immobiglias e participaziuns en la valita da 6 milliuns francs.

  • Vopna da Vaz
    Legenda: Vaz RTR

    Vaz

    Votantas e votants da Vaz han acceptà la revisiun da duas leschas: Quella per il provediment d’aua cun 636 cunter 204 vuschs, e quella per reglar il rument en vischnanca cun 522 cunter 319 vuschs.

  • Vopna da Poschiavo
    Legenda: Poschiavo RTR

    Poschiavo

    Poschiavo ha elegì ses parlament communal - l'uschenumnada giunta. 10 persunas fan da nov part a quest gremi: Per la fracziun Aino èn quai Romano Tosio (PCD) e Daniele Compagnoni (PoschiavoViva). Ils novs per la fracziun Borgo èn Michaela Paganini (PPS), Arno Marchesi (PPS), Cristina Plozza (PLD), Lorenzo Heiss (PoschiavoViva) e Carlo Vassella (PoschiavoViva). La fracziun da Prada represchentan Elio Capelli (PCD) e Michaela Cortesi-Bontognali (PCD) e per Le Prese è Monica Pirovino (PCD) vegnida elegida. Gia la fin settember era Giovanni Jochum (PLD) vegnì elegì sco president communal, e betg pli Alessandro Della Vedova (PCD). Plinavant han ils Puschlavins ditg GEA al credit dad 1.95 milliuns francs per renovar la plazza da sport «Curtin» inclusiv in edifizi cun gardarobas. L’uniun Valposchiavo Calcio paja supplementarmain ina contribuziun da 300’000 francs.

  • Vopna da Mesocco
    Legenda: Mesocco RTR

    Mesocco

    Mesocco ha elegì ses 21 represchentants per il parlament communal. A disposiziun èn stadas en total 26 persunas. La suprastanza communala ha Mesocco gia elegì avant in mais.

RTR votaziuns 25-11-2018

Artitgels legids il pli savens