Siglir tar il cuntegn
cuntegn

Votaziuns ed elecziuns Turgovia refusa 'iniziativa da scola'

Cun dapli che 75% tramettan ils Turgovians da l’aua giu 'l’iniziativa da scola'. Tuttas 70 vischnancas din cleramain na. Cun l’uschenumnada iniziativa da furmaziun avess il plan d’instrucziun 21 duì vegnir impedì. Uschè lunsch na vegni betg – la regenza decida vinavant davart il plan d’instrucziun.

L’iniziativa «Ja zu einer guten Thurgauer Volksschule» pretenda ch’ils plans d’instrucziun ston en futur vegnir approvads dal Cussegl grond. Las refurmaziuns dals ultims 20 onns hajan donnegià la scola e stoppian vegnidas franadas, din ils iniziants. A lez appartegnan cussegls chantunals da la PPS, PCD, PS e duas partidas pitschnas.

La critica sa drizza principalmain cunter il plan d’instrucziun 21. Cun quel vegnian las prestaziuns dals scolars en tudestg e matematica vinavant a sa sbassar.

In scolar en scola che scriva.
Legenda: Tenor ils iniziants han las refurmas dals ultims onns gì effects negativs sin la scola. Keystone

Parlament è encunter

En il plan d’instrucziun duain vegnir fixadas concretas finamiras da l’instrucziun d’annadas: Leger, scriver, far quint ed ina «tenuta da lavur positiva». Il plan d’instrucziun stoppia vegnir preschentà al parlament per la votaziun e suttamess al referendum facultativ. Ils plans d’instrucziun nov decretads dapi l’onn 2015 stoppian vegnir adattads ed approvads aifer dus onns.

Il parlament chantunal ha refusà l’iniziativa cun 97 cunter 22 vuschs. Vuschs criticas cunter la scola populara dettia quai adina, avevan argumentà ils adversaris da l’iniziativa. Il plan d’instrucziun saja mo il palancà da basa, decisiv sajan ils scolasts. La regenza aveva schizunt mess en dumonda la valaivladad da la dumonda dal pievel, perquai ch’in gea avess retroactiv prendì davent cumpetenzas ad ella.

RR novitads 15:00