Siglir tar il cuntegn

2018/06/10 Emprima enquista da trend mussa in Gea ed in Na

Sch'i fiss stà da votar ils 21 d'avrigl, lura fiss la lescha davart ils gieus per daners vegnida approvada dals votants e las votantas svizzers, quai cun ina pitschna maioritad. L'iniziativa per il daner cumplain avess il pievel svizzer dentant refusà. Quai mussa l'emprima enquista da trend.

La retschertga da gfs.bern mussa in trend na a l'iniziativa per il daner cumplain ed in gea a la lescha davart gieus per daners.
Legenda: La retschertga da gfs.bern mussa in trend na a l'iniziativa per il daner cumplain ed in gea a la lescha davart gieus per daners. RTR, GRAFICA

Lescha davart ils gieus per daners

52% èn il mument decis u plitost decis persuenter dad approvar la lescha davart gieus per daners. En Svizra tudestga èn ils votants pli sceptics davart la nova lescha che en la Svizra romanda. L'enquista mussa ch'in conflict da generaziuns è vinavant pussaivel. Che gieus da daners en l'internet vegnan serrads en Svizra è il sulet argument cun effect dals adversaris da la lescha. Ils aderents pon il mument profitar da l'argument che la nova lescha pudess impedir che daners svaneschian en l'exteriur.

La retschertga da gfs.bern mussa ch'il suveran vegna a dir gea a la lescha davart gieus per daners.
Legenda: La retschertga da gfs.bern mussa che 52% èn per la lescha davart gieus per daners. RTR, GRAFICA

L'iniziativa per il daner cumplain

49% da las votantas e dals votants svizzers èn decis. En avantatg èn fin uss ils adversaris. L'iniziativa è predisponida negativ. Tuttas partidas èn cunter l'iniziativa. Ils arguments èn ina pli gronda controlla dal stadi cunter ina midada ristgada dal sistem. Tenor l'enquista n'èsi pauc probabel che l'iniziativa pudess vegnir approvada.

La retschertga da gfs.bern mussa che be 35% èn per l'iniziativa per il daner cumplain.
Legenda: La retschertga da gfs.bern mussa che be 35% èn per l'iniziativa per il daner cumplain. RTR, GRAFICA

Per tge vai insumma?

Gieus da daners: Cun la nova lescha èn casinos online da l'exteriur bloccads en Svizra.

Daner cumplain: Tgi duai avair la pussanza da noss daners? Duai quai da nov esser mo la Banca naziunala svizra (BNS) u sco fin uss la BNS e las bancas privatas?

Enquista dal GfS sin incumbensa da la SRG SSR

L’enquista ha fatg la Societad svizra da retschertgas socialas praticas (GfS) sin incumbensa da la SRG SSR. Per l’enquista han ins dumandà 1'201 votants represchentativs, quai tranter ils 16 e 26 d’avrigl 2018. La quota d’errur è tar +/- 2,9%, quai tar ina probabilitad da 95%. Plinavant fan ils auturs da l'enquista attent, che quels resultats mussan la situaziun mumentana da 50 dis avant la votaziun federala.

RR novitads 06:00