Siglir tar il cuntegn

Votaziuns communalas Scuol: Las uras da parcar restan

Il suveran da Scuol refusa l'iniziativa «Dapli per cumprar – damain per parcar»: L'iniziativa vegn sbittada cun 883:655. Approvada vegn percunter la cuntraproposta da la suprastanza – cun 873:570. Uschia realisescha Scuol in concept da parcar differenzià.

Ura da parcar.
Legenda: Las uras da parcar en il center da Scuol. RTR

Il suveran da Scuol ha ditg Na a l'iniziativa per parcadis gratuits a Scuol. Quai cun 57,41% cunter 42,59%. La cuntraproposta per ina lescha da parcar da la suprastanza communala è approvada cun 60,5% cunter 39,50%.

Uschia custan ils parcadis en ils centers vinavant. En la periferia da las fracziuns da Scuol duai dentant en avegnir dar parcadis gratuits. La suprastanza communala sto ussa elavurar ina ordinaziun cun ils detagls per la lescha da parcar a Scuol.

Iniziativa «Dapli per cumprar – damain per parcar»

Personen-Box aufklappenPersonen-Box zuklappen

La vischnanca fusiunada da Scuol n'ha nagina lescha che regla la dumonda dals parcadis per tut las fracziuns. Tenor ils iniziants da l'iniziativa n'èsi betg gist, ch'ins sto pajar a Sent ed a Scuol, ma en autras fracziuns betg. Per che Scuol daventia pli attractiv fan ils iniziants la proposta che parcar daventa dapertut gratuit.

Per parcadis permanents proponan ils iniziants ina agen reglament.

Cuntraproposta da la suprastanza

Tenor la suprastanza èsi be pussaivel da coordinar il traffic tras in sistem controllà. Il parcadis en ils centers, cunzunt en la fracziun Scuol, duain star a disposiziun a tgi che fa cumpras. Vegnissan ils parcadis gratuits, sche lura vegnissan era ils parcadis els centers duvrads sco parcadis permanents. Ultra da quai mancassan 170'000 francs en la cassa.

Perquai fa la suprastanza la cuntraproposta che prevesa parcadis nua che l'automobilist è obligà da surpigliar ils custs en ils centers. En la periferia da las fracziuns pudess i dentant dar parcadis gratuits.

Iniziants èn malgrà la refusa cuntents

Era sch'ils iniziants èn anc adina persvas da lur idea e lur iniziativa èn els cuntents – era sch'els avessan preferì in autra fin. Urs Domenig, in dals iniziants è cuntent ch'i saja insumma vegnì discutà. Entant dovria anc la ordinaziun e la concreta lescha, Urs Domenig tegn bain avert las ureglias è dentant da l'avis che la decisiun è fatga e d'acceptar.

Reacziun dal president communal Fanzun

Christian Fanzun è fitg cuntent cun il resultat. Sia strategia saja stà da vegnir communablamain tar ina soluziun. Uss stettia la suprastanza avant ina buna basa da partenza per la proxima fasa: I valia da surlavurar tut e preparar la lescha.

Finalmain vai per in bun resultat. E betg per tgi ch'ha gudagnà.
Autur: Christian FanzunPresident communal

Votaziun en scrit – sche 15 persunas giavischan

Plinavant han ils da Scuol decidì che 15 persunas cun dretg da vuschar pon en il futur pretender ina votaziun a scrit tar la radunanza communala. Ils da Scuol han numnadamain approvà la cuntraproposta da la suprastanza cun 59,35% cunter 40,65%.

Refusà cun be 13 vuschs differenza han ils da Scuol l'iniziativa che vuleva ch'ina suletta persuna pudess pretender ina votaziun a scrit. Quai cun 681:668 u 50,48% cunter 49,52%.

Iniziativa «Midament d'art. 34 4 da la constituziun communala»

Personen-Box aufklappenPersonen-Box zuklappen

La finamira da l'iniziativa è da pussibilitar tar votaziuns delicatas in resultat senza influenzar. Mintgin duai pudair vuschar sco el veglia e senza sa sentir observà. Perquai vul l'iniziativa che votaziuns vegnian fatgas en scrit schebain ina persuna cun dretg da votar giavischa quai.

Cuntraproposta da la suprastanza

La suprastanza propona vinavant da far votaziuns avertas. Sche 15 persunas giavischan da votar en scrit, sche sto quai giavisch vegnir resguardà.

Revisiun parziala da la constituziun communala

La finala ha il suveran approvà cun gronda maioritad la revisiun da la constituziun federala. Quai cun 83,85% Gea cunter 16,15% Na.

Da nov pon burgais svizzers ed esters cun permissiun da domicil vuschar. La urna da votaziuns vegn da nov be pli plazzada en la chasa communala a Scuol, e na betg pli en mintga fracziun. Persunas cun dretg da votar decidan davart la delegaziun da lavurs ad ina regiun, e quai independentamain da la summa dals custs. E la cumissiun da gestiun sa cumpona tenor la constituziun revedida sezza. Nagin collavuratur da l’administraziun communala po pli scriver il protocol.

Revisiun parziala da la constituziun communala

Personen-Box aufklappenPersonen-Box zuklappen

La constituziun communala vertenta datti dapi la fusiun l'onn 2015. Pervia da dischavantatgs da quella propona la suprastanza da midar disposiziuns che n'èn betg sa cumprovadas.

Dumengia da votaziuns 11:00