Siglir tar il cuntegn
cuntegn

Votaziuns communalas Scolars da Turitg emprendan vinavant englais e franzos

Ils votants e las votantas da Turitg han ditg cleramain na ad in’iniziativa che vuleva stritgar in linguatg ester ord il plan d’instrucziun da las scolas primaras.

In mat en scola cun in exercizi da franzos enta maun.
Legenda: Ils scolars primars da Turitg emprendan era vinavant franzos ed englais. Keystone

L’iniziativa ch'era vegnida lantschada da las uniuns da scolasts, ha gì nagina schanza tar la populaziun. Cun 60,8% ha il suveran refusà quella.

Ils scolars e las scolaras da Turitg emprendan pia vinavant davent da la segunda classa englais e davent da la tschintgavla classa sco segund linguatg ester franzos. Fiss l’iniziativa vegnida acceptada vessan ils da Turitg spustà il franzos sin il stgalim superiur.

Cun questa decisiun ha il suveran da Turitg confirmà sia posiziun. 2008 aveva el ditg cleramain gea al concordat da Harmos ch’aveva sco finamira d’introducir duas linguas estras en scola primara.

Il tema interessescha era il chantun Grischun. Il cumenzament da matg ha il Tribunal federal decidì che l’iniziativa grischuna per mo ina lingua estra en scola primara saja valaivla. Il chantun Turgovia ha gia decidì da spustar l’instrucziun dal linguatg franzos sin il stgalim superiur.

RR novitads 15:00