Siglir tar il cuntegn
cuntegn

2017/05/21 Survista da las votaziuns

Oz votescha il suveran svizzer davart il referendum encunter la nova lescha d'energia. Votaziuns chantunalas na datti naginas, dentant intginas communalas.

In maun che bitta il scrit da votar en l'urna.
Legenda: Votaziun federala davart la lescha d'energia e diversas votaziuns communalas. Keystone

La nova lescha d’energia vul reducir il consum d’energia, augmentar l’effizienza energetica e promover las energias regenerablas. Quai èn las trais finamiras principalas, sper il scumond da fabritgar en avegnir ovras electricas atomaras. La lescha cuntegn uschè emprimas mesiras per realisar la strategia d’energia 2050 da la confederaziun svizra. La lescha va en votaziun perquai ch’i è vegnì fatg in referendum encunter.

Sin livel naziunal è quai oz l’unica votaziun. Votaziuns chantunalas na datti en il chantun Grischun naginas. I dat però intginas votaziuns communalas.

Glion elegia nova presidenta communala

A Glion per exempel vegn elegì ina nova presidenta communala, ina nova suprastanza ed in nov parlament. Suletta candidata per il presidi è Carmelia Maissen. Per ils ulteriurs quatter commembers da la suprastanza datti dentant tschintg candidatas e candidats.

Ultra da quai ston ils votants e las votantas da Glion era decider davart l’introducziun d’ina zona d’ospital.

Votaziuns communalas

Poschiavo e Brusio voteschan sur da la surdada dal transport da rument da la regiun. Ils da Tujetsch decidan sur d'ina pendiculara sin il Cuolm da Vi per colligiar il territori da skis da Sedrun cun Mustér. Ed a Cuira vegn decidì sur dal dretg da construcziun dal areal dal anteriur lavuratori forestal. Arosa e Scuol voteschan per sendas u trails da bike e diversas vischnancas decidan sur da midaments da la planisaziun locala.

RR novitads 07:00