Siglir tar il cuntegn
Inhalt

Votaziuns federalas Suenter il na a la revisiun da taglia cumenza la lavur da nov

Prest 60% dals votants na vulan savair nagut da novas deducziuns da taglia per interpresas. Ina terrada per il Cussegl federal e la maioritad burgaisa en il Parlament federal. Ils victurs da la sanestra vesan en il votum il messadi ch'i dovria ussa ina revisiun pli equilibrada.

Balluns.
Legenda: Il na munta ch’i dovra ussa ina nova revisiun, la revisiun da la taglia sin interpresas 4. Keystone

Il resultat saja ina gronda victoria per els mo era ina gronda surpraisa, di Beat Jans (CN/PS). Uss saja cler ch’ils blers votants na sajan betg cuntents cun la politica da la maioritad burgaisa en il Parlament federal. I dovria uss ina midada en la politica fiscala: «I na po betg esser ch’ins distgargia mo ils privilegiai e las interpresas grondas. Ins sto era guardar per tschella glieud e las interpresas mesaunas e pitschnas. E quai è il signal ch’il suveran ha dà oz en tutta franchezza.»

Autras raschuns per il cler na vesa ses collega da partida Hans Stöckli (CS/PS) en la cumplexitad dal project ed en il fatg ch'ins vulevia far la refurma sin il dies da las vischnancas e da las citads. «Jau hai adina ditg che sche vus na garantis betg ch’ins po cumpensar las sperditas che resultan tar las vischnancas ed las citads lura na vegni betg a dar ina maioritad. Quai sto ussa vegnir curregì.»

I dovra ina nova revisiun...

Fertant ch'ils adversaris san para exact pertge ch'igl ha dà in na, han ils aderents pli grev da chattar raschuns per il naufragi da la revisiun. Peter Hegglin (CS/PCD) explitgescha il resultat cun la problematica ch'ins n’haja betg pudì dir cleramain tge consequenzas che la revisiun vegnia ad avair. «Sch’ins vegn sin terren nunenconuschent, lura datti tschertas ristgas. Mo qua e là ston ins ristgar insatge sch’ins vul far in ulteriur pass en il futur.»

Suenter la terrada da la refurma vulan pia tant ils aderents sco ils adversaris uschè svelt sco pussaivel ina nova revisiun. Era per Hegglin èsi cler, che quai è necessari. «Quai debitain nus a noss giuvens ed a noss emploiads. D’avair interessants posts da lavur, la glieud po gudagnar daners ed uschia era pajar taglias.» Perquai stoppian ins – per simplifitgar il project – guardar nua e con profund ins veglia far quai.

...ma co duess quella vesair ora?

Cusseglier federal Ueli Maurer admonescha dentant ch'i saja pussaivel ch'interpresas bandunian la Svizra e vegnian betg pli ad investir qua. «Nus stuain immediat cumenzar cun la lavur per evitar che la OECD metta il 2019 la Svizra sin la glista naira da stadis che pussibiliteschan fraud da taglia.»

Hans Stöckli da la PS giavischa però insatge auter dal cusseglier federal. «Signur Maurer sto savair ch’el è il minister da finanzas e betg quel che reparta regals.»
Era veglia la sanestra anc ina giada purtar viaden ella discussiun la taglia sin gudogn da chapital, di Beat Jans. «Quella pretendain nus perquai che nus essan dal maini che quella è il dretg instrument. Cler è che la deducziun da taglia sin agen chapital e uss giud maisa. Tals trics da taglia na vegnan betg acceptads en Svizra.»

Il na dad oz è pia la fin da la revisiun da la taglia sin interpresas III, mo il medem mument era l’entschatta da las discussiuns per la revisiun da la taglia sin interpresas IV.

RR actualitad 17:00