Siglir tar il cuntegn
cuntegn

Votaziuns communalas Parc Adula fa naufragi

Il resultat è cler: 8 da 17 vischnancas han ditg «na» al parc - 4 avessan quai sin il pli dastgà esser. Plinavant n'è la zona da coc necessaria betg vegnida cuntanschida. Suenter 16 onns lavur ed expensas dad 8 fin 10 miliuns francs na vegn il Parc Adula uschia betg realisà en questa furma.

Surselva procura per il naufragi

Ils «na» da la Surselva (Medel, Mustér, Sumvitg, Val e Vrin) e da Nufenen han procurà baud per il naufragi. En il Tessin ed il Grischun talian hai dà ils blers «gea» cun Calanca, Soazza, Mesocco, Acquarossa, Rossa. Tiers vegnan ils «gea» da Spleia, Valragn e Trun. Blenio la vischnanca cun il pli grond territori en la zona da coc (53,92 km2) ha dentant er ditg na. Sco emprima vischnaca sursilvana aveva Val refusà il parc gia il venderdi, quai cleramain cun 276 cunter 63 vuschs. La vischnanca vess contribuì 11.45 km2.

Senza ils 46,96 km2 da las quatter vischnancas da Medel, Sumvitg, Val e Vrin n'èn betg vegnids ensemen ils 110 km2 ch’i avess duvrà en la zona da coc. E cun ils «na» da la Surselva e da Nufenen n'è plinavant betg pli adempli il criteri che be quatter vischnancas dastgan refusar il parc. Las nov vischnancas ch'han ditg «gea» avessan contribuì ensemen sulet 34,4 km2 en la zona da coc.

2 «gea» spetgads da Trun e Buseno

Trun e Buseno han ditg gea al Parc Adula. En omaduas vischnancas eri da quintar cun il gea perquai ch'il parc vala là sco schanza economica per la regiun. Trun ha ditg gea cun 96 vuschs differenza. Sin la zona da coc n'avessan ils geas da Trun e Buseno gì nagin'influenza. Omaduas vischancas n'eran betg en il territori da la zona da coc.

Vuschs maschadadas en Valragn «gea»

La vischnanca Valragn ha ditg «gea» cun 21 cunter 10 vuschs. Ella avess contribuì 8.44 km2 en la zona da coc. Il vischin Nufenen ha refusà il parc, però be stgars cun 29 cunter 20 vuschs. Spleia percuntercomi ha ditg gea cun 62 cunter 39 vuschs.

Sustegn en las valladas dal sid

Sco emprima vischnanca en il rudè da radunanzas communalas dal venderdi saira aveva decidì Calanca cun 44 cunter 11 vuschs cleramain en favur dal parc.

Necessari fiss stà ...

Da las 17 vischnancas avessan almain 13 stuì dir gea al parc naziunal. Cun il na da Blegn - cun 53 km2 surfatscha en la zona centrala - è il na stà cler.

Ina zona centrala en plirs tocs avess tenor ordinaziun da parcs federala duvrà almain 110 km2. Sche la zona centrala na fiss betg stada sparpigliada avessan bastà 100 km2.

La vischnanca dal Mesauc è stada l'emprima insumma da las 17 vischnancas ch'ha votà davart il Parc Adula. Cun gronda maioritad ha la radunanza communala da gievgia saira ditg «gea», quai cun 62 cunter 8 vuschs.

Er gia decis la gievgia aveva Soazza, quai cun 62 gea cunter 8 na. La radunanza haja tractà la fatschenta senza grondas discussiuns, sco il chanzlist da Soazza ha communitgà ad RTR.

Discurs davart in parc regiunal?

Cun las vischnancas enturn il San Bernardino ch’han ditg relativamain cler gea pudessan ussa vegnir lantschads discurs per tut tenor fundar in parc regiunal, ha ditg il president da l’Uniun Parc Adula Fabrizio Keller. Davart schliar l’uniun duai pir vegnir decis a chaschun dad ina radunanza da commembers.

Las decisiuns ...

Vischnanca
Gea
NaDecisiun
Acquarossa578372GEA
Blegn
453713NA
Buseno
237GEA
Calanca4411GEA
Lumnezia (Vrin)
36134NA
Medel139143NA
Mesocco375208GEA
Mustér561606NA
Nufenen2029NA
Rossa5318GEA
Seravalle579630NA
Soazza628GEA
Spleia6239GEA
Sumvitg370455NA
Trun346250GEA
Val63276NA
Valragn2110GEA

1 Commentari

Navigation aufklappen Navigation zuklappen

Vus essas annunzià sco Who ? (whoareyou) (Sortir)

Nus avain survegnì voss commentari e mattin el online suenter ina controlla

Approvai per plaschair las prescripziuns davart la protecziun da datas.
Tschiffar in commentari

500 segns èn anc disponibels

Cun trametter quest commentari accept jau la netichetta da rtr.ch.

I è capità in errur. Per plaschair anc ina giada empruvar.

  • Commentar da bundi giusep, flem
    schia, ussa eisi decidiu. igl ei iu la via democratica partenent il parc adula. e jeu crei che la populaziun sto sestentar vinavon da fadigiar il paun da mintgadi e viver ellas vischnauncas che havessen fatg part dil parc naziunal, parc adula. il sulet salvament fuss il parc adula forsa buca staus. aber in emprova da salvar e promover l`economia en surselva fuss ei stau, senza dubi. numdadiu, forsa gartegia in`autra iniziativa vegnenta a pro dall`economia en surselva.
    Refusar refusar il commentari Respunder selecziunar per dar resposta sin in commentari